ரூ. 20 கோடியில் நாமக்கல் ரயில் நிலையம் விரிவாக்கம்: மத்திய இணை அமைச்சா் எல்.முருகன் ஆய்வு

‘அம்ரித் பாரத்’ திட்டத்தின் கீழ் ரூ. 20 கோடி மதிப்பீட்டில் நாமக்கல் ரயில் நிலையம் விரிவாக்கம் செய்யப்படுவதை மத்திய தகவல் ஒலிபரப்பு மற்றும் நாடாளுமன்ற விவகாரங்கள் துறை இணை அமைச்சா் எல்.முருகன் புதன்கிழமை பாா்வையிட்டாா்.

தமிழகத்தில் ரயில் நிலையங்களை மேம்படுத்தும் பொருட்டு, மத்திய அரசின் ‘அம்ரித் பாரத்’ திட்டத்தின் கீழ் 71 ரயில் நிலையங்களில் பணிகள் நடைபெற்று வருகின்றன. அவற்றில் நாமக்கல் ரயில் நிலையமும் ஒன்று. இங்கு, புதிய நுழைவாயில், இருசக்கர, நான்கு சக்கர வாகனங்கள் நிறுத்துமிடம், மின் தூக்கி, நடைமேம்பாலம், பயணிகள் ஓய்வறை, கழிவறை, ரயில்வே பாதுகாப்பு படை அறை, பொருள்கள் வைப்பறை, விருந்தினா் அறை அமைக்கும் பணிகள் ரூ. 14.50 கோடியில் நடைபெற்று வருகின்றன. அதேபோல, ரூ. 5.50 கோடியில் சரக்கு முனையம் விரிவாக்கப் பணிகளும் நடைபெற்று வருகின்றன.

இந்தநிலையில் பல்வேறு நிகழ்ச்சிகளில் பங்கேற்பதற்காக நாமக்கல் வந்த மத்திய இணை அமைச்சா் எல்.முருகன், புதன்கிழமை ரயில் நிலையத்தை பாா்வையிட்டு ஆய்வு செய்தாா். அங்கிருந்த அதிகாரிகளிடம் விரிவாக்கப் பணிகள் எப்போது முடிவடையும், குறைபாடுகள், தேவையான வசதிகள் உள்ளிட்டவை குறித்தும், ரயிலுக்காக காத்திருந்த பயணிகளிடமும் குறைகளை கேட்டாா். மாவட்ட ரயில் உபயோகிப்பாளா் சங்கத்தினா், ஈரோடு வழியாக புதுதில்லி செல்வதற்கு ரயில்கள் இருந்தபோதும், வாரம் ஒரு முறை திருநெல்வேலியில் இருந்து புதுதில்லிக்கு இயக்கப்படும் நெல்லை கத்ரா விரைவு ரயிலை நாமக்கல் வழியே இயக்க வேண்டும் என கோரிக்கை விடுத்தனா். அதற்கான நடவடிக்கை எடுக்கப்படும் என அமைச்சா் தெரிவித்தாா். நாமக்கல் ரயில் நிலைய சரக்கு முனையத்தில், லாரிகள் நிறுத்துமிடம், சரக்கு அறைகள் கட்டுமானப் பணிகள் குறித்து, அலுவலா்களிடம் கேட்டறிந்தாா். அங்கிருந்த நாமக்கல் கூட்ஸ்செட் லாரி உரிமையாளா்கள் சங்கத்தினா், ரயில் நிலையத்தை ஒட்டிய சாலைகள் குண்டும், குழியுமாக இருப்பதாகவும், நடைமேடை மோசமான நிலையில் உள்ளதாகவும், இரவு நேரத்தில் மின்விளக்கு வசதியில்லை என கோரிக்கைகளை மனுவாக மத்திய இணை அமைச்சரிடம் வழங்கினா். அவரும் உரிய நடவடிக்கை எடுப்பதாக தெரிவித்தாா்.

இந்த ஆய்வின்போது, பாஜக மாவட்டத் தலைவா்கள் கே.பி. சரவணன், எம்.ராஜேஷ்குமாா், சேலம் ரயில்வே கோட்ட துணை மேலாளா் என்.சிவலிங்கம், முதுநிலை திட்ட மேலாளா் என்.கங்காராஜு, ரயில்வே துறை அதிகாரிகள், மாவட்ட ரயில் உபயோகிப்பாளா்கள் சங்கத் தலைவா் எம். சுப்பிரமணி, செயலாளா் காா்த்திக் ஆகியோா் உடனிருந்தனா்.

என்கே-11-ரயில்

நாமக்கல் ரயில் நிலையத்தில் ஆய்வு மத்திய இணை அமைச்சா் எல்.முருகன்.