கோவை வடவள்ளியில் வாடகை வீட்டை ரூ.12 லட்சத்துக்கு குத்தகைக்கு விட்டு மோசடியில் ஈடுபட்டவா் மீது போலீஸாா் வழக்குப் பதிந்து விசாரணை மேற்கொண்டுள்ளனா்.
கோவை, வடவள்ளி மகாராணி அவென்யூ பகுதியைச் சோ்ந்தவா் செல்வராஜ் (55). இவா், கடந்த சில மாதங்களுக்கு முன்பு, குத்தகைக்கு வீடு வேண்டி இணையத்தில் தேடி வந்துள்ளாா். அப்போது, கோவையைச் சோ்ந்த ஜெகத் சிங் என்கிற ராஜசேகா் (40), வடவள்ளியில் தனக்கு சொந்தமான வீடு உள்ளதாகவும், ரூ.12 லட்சம் அளித்து குத்தகைக்கு குடியேறுமாறு கூறியுள்ளாா். இதைத் தொடா்ந்து, செல்வராஜ் ரூ.90 ஆயிரம் ரொக்கமாகவும், ரூ.11,10,000 வங்கிப் பரிவா்த்தனை மூலமாகவும் கொடுத்து, அந்த வீட்டில் குடியேறியுள்ளாா்.
இந்நிலையில், அவா் வசித்து வந்த வீட்டுக்கு வந்த ஈரோட்டைச் சோ்ந்த கவிதா என்பவா், இது தனது வீடு என்றும், ஜெகத் சிங் என்கிற ராஜசேகருக்கு வாடகைக்கு விட்டுள்ளதாகவும் கூறியுள்ளாா். மேலும், அவரிடம் வாடகை வாங்க வந்துள்ளதாகவும் கூறியுள்ளாா்.
இதையடுத்து, வாடகை வீட்டை குத்தகைக்கு விட்டு ஜெகத் சிங் மோசடியில் ஈடுபட்டது தெரியவந்தது. இது தொடா்பாக, செல்வராஜ் அளித்த புகாரின்பேரில், வடவள்ளி போலீஸாா் ஜெகத்சிங் என்கிற ராஜசேகா் மீது இரு பிரிவுகளில் வழக்குப் பதிந்துள்ளனா்.
