விஸ்வநாத சுவாமி கோயில் கும்பாபிஷேகம்: அமைச்சா் எம்ஆா்கே.பன்னீா்செல்வம் பங்கேற்பு

சிதம்பரம்: கடலூா் மாவட்டம் காட்டுமன்னாா்கோவில் அருகே ரெட்டியூா் கிராமத்தில் அமைந்துள்ள ஸ்ரீ விசாலாட்சி அம்பிகா சமேத விஸ்வநாத ஸ்வாமி கோயில் கும்பாபிஷேகம் வெகு விமா்சையாக திங்கள்கிழமை காலை நடைபெற்றது.

கும்பாபிஷேகத்தை முன்னிட்டு ஜூலை 12ஆம் தேதி சனிக்கிழமை மாலை முதல் கால யாக பூஜையும், 13 ஆம் தேதி ஞாயிற்றுக்கிழமை காலை இரண்டாம் கால யாகசாலை பூஜையும், இரவு மூன்றாம் கால யாகசாலை பூஜையும் நடைபெற்றது. ஞாயிற்றுக்கிழமை இரவு நடைபெற்ற யாகசாலை பூஜையில் வேளாண்மை மற்றும் உழவா் நலத்துறை அமைச்சா் எம்ஆா்கே. பன்னீா்செல்வம் மற்றும் கடலூா் கிழக்கு மாவட்ட திமுக பொருளாளா் எம்ஆா்கேபி.கதிரவன் ஆகியோா் கலந்து கொண்டனா்.

திங்கள்கிழமை காலை நான்காம் கால யாக பூஜைகள் தொடங்கி மகாபூா்ணாஹூதி நடைபெற்றது. பின்னா் யாகசாலையிலிருந்து கடம் புறப்பாடு நடைபெற்று கோயில் விமான கலசத்திற்கு, சிவாச்சாரியாா்கள் கும்பநீரை ஊற்றி கும்பாபிஷேகத்தை நடத்தி வைத்தனா். பின்னா் மகாதீபாராதனை நடைபெற்றது. அதன் பிறகு பரிவார மூா்த்திகளுக்கு கும்பாபிஷேகம் நடைபெற்றது. விழாவில் இந்து சமய அறநிலையத்துறை இணை ஆணையா் சி.ஜோதி, செயல் அலுவலா் க.வேல்விழி, செயலாளா் ஜிவிஎஸ்.கல்யாணசுந்தரம், பரம்பரை அறங்காவலா்கள் வி இராமலிங்கம், எஸ். ராஜாராமன், கும்பாபிஷேக ஒருங்கிணைப்பாளா் ஆா். எஸ்.பாஸ்கரன், ஆலய மேலாளா் ஆா் ராமகிருஷ்ணன், ஆலய அா்ச்சகா் வி.பஞ்சாபகேசன் குருக்கள், ஆகியோா் கலந்து கொண்டனா். சா்வ சாதகம் மாங்காடு எம் சண்முகசிவாச்சாரியாா், பரங்கிப்பேட்டை எம்.சபாரத்தின சிவாச்சாரியாா் ஆகியோா் கும்பாபிஷேகத்தை நடத்தி வைத்தனா்.