வேங்கைவயல் வழக்கின் குற்றப்பத்திரிகை ஏற்பு வன்கொடுமை பிரிவில் வராததால் குற்றவியல் நடுவா் மன்றத்துக்கு மாற்றம்

வேங்கைவயல் வழக்கின் குற்றப்பத்திரிகை ஏற்றுக் கொள்ளப்பட்டதையடுத்து இந்த வழக்கு வன்கொடுமைத் தடுப்புச் சட்டப் பிரிவுகளில் வராது என்பதால் குற்றவியல் நடுவா் நீதிமன்றத்துக்கு வழக்கு மாற்றப்பட்டது.

புதுக்கோட்டை மாவட்டம், வேங்கைவயல் பட்டியலினக் குடியிருப்பிலுள்ள மேல்நிலை நீா்த்தேக்கத் தொட்டியில் மனிதக் கழிவு கலக்கப்பட்ட சம்பவத்தில், அதே பகுதியைச் சோ்ந்த 3 போ் மீது குற்றம்சாட்டி சிபிசிஐடி போலீஸாா் அண்மையில் விசாரணை அறிக்கையை நீதிமன்றத்தில் தாக்கல் செய்திருந்தனா்.

வேங்கைவயல் மற்றும் இறையூரை உள்ளடக்கிய முத்துக்காடு ஊராட்சித் தலைவா் பத்மாவின் கணவா் முத்தையாவுக்கும், குற்றம் சாட்டப்படுவோருக்கும் இடையே ஏற்பட்டிருந்த முன்விரோதம்தான், தண்ணீா்த் தொட்டியில் மனிதக்கழிவு கலக்கப்பட்டதற்கு காரணம் என்றும், ஜாதி ரீதியான சம்பவம் அல்ல என்றும் சிபிசிஐடியின் அந்த அறிக்கையில் தெரிவிக்கப்பட்டிருந்தது.

இந்த விசாரணை அறிக்கையை நீதிமன்றம் ஏற்கக் கூடாது என புகாா்தாரா் கனகராஜ் தரப்பில் மனுதாக்கல் செய்யப்பட்டிருந்தது. அதேபோல, அதே பகுதியினரே மனிதக் கழிவைக் கலந்திருக்கிறாா்கள் என்பதால் வன்கொடுமை சட்டப் பிரிவுகளை நீக்கிவிட்டு, வழக்கு விசாரணையை குற்றவியல் நடுவா் மன்றத்துக்கு மாற்றக் கோரி, சிபிசிஐடி தரப்பிலும் மனு தாக்கல் செய்யப்பட்டிருந்தது.

இந்த இரு மனுக்கள் மீதான விசாரணை கடந்த சனிக்கிழமை (பிப்.1)மாவட்ட எஸ்சி எஸ்டி வன்கொடுமைத் தடுப்புச் சட்ட சிறப்பு நீதிமன்றத்தில் நடைபெற்றது. இரு தரப்பு வாதங்களையும் பதிவு செய்த நீதிபதி ஜி.எம். வசந்தி தீா்ப்பை திங்கள்கிழமைக்கு(பிப்.3) ஒத்திவைத்திருந்தாா்.இந்த நிலையில் திங்கள்கிழமை காலை தீா்ப்பளிக்கப்பட்டது.

அதில், புகாா்தாரா் கனகராஜின் மனுவை தள்ளுபடி செய்தும், சிபிசிஐடி மனுவை ஏற்றும், வழக்கு விசாரணையை புதுக்கோட்டை குற்றவியல் நீதிமன்றம் எண். 2-க்கு மாற்றி நீதிபதி தீா்ப்பளித்தாா்.

இதுகுறித்து அரசு வழக்குரைஞா் கே. என் குமாா் செய்தியாளா்களிடம் கூறியது: வேங்கைவயல் வழக்கில் சிபிசிஐடி போலீஸாா் தாக்கல் செய்திருந்த ஆவணங்கள் மற்றும் வாதங்களை ஏற்று, வன்கொடுமைத் தடுப்புச் சட்டத்தின்கீழ் இவ்வழக்கு வராது என முடிவு செய்து, வழக்கு விசாரணையை புதுக்கோட்டை குற்றவியல் நடுவா் மன்றம் எண். 2-க்கு மாற்றி நீதிபதி உத்தரவிட்டுள்ளாா்.

இனி அந்த நீதிமன்றத்தில்தான் சிபிசிஐடியின் குற்றப்பத்திரிகை தாக்கல் செய்யப்படும். அதன்பிறகு குற்றம் சாட்டப்பட்டவா்களுக்கு அழைப்பாணை அனுப்பி வைத்து, குற்றப்பத்திரிகை வழங்கப்படும் என்றாா் கே.என். குமாா்.