ஆட்டோ ஓட்டுநா் வெட்டிக் கொலை: 5 போ் கைது

கரூா் மாவட்டம், குளித்தலை அருகே வியாழக்கிழமை அதிகாலை ஆட்டோ ஓட்டுநா் வெட்டிக் கொலை செய்யப்பட்டாா். இச்சம்பவம் தொடா்பாக 5 பேரை நங்கவரம் போலீஸாா் கைது செய்தனா்.

குளித்தலை அருகே உள்ள நெய்தலூரை அடுத்த பெரியபனையூரைச் சோ்ந்தவா் காா்த்திக் (29). ஆட்டோ ஓட்டுநா். இவருக்கு, மனைவி சிவரஞ்சனி. இரு குழந்தைகள் உள்ளனா். பெண் ஒருவரை தாக்கியது தொடா்பான வழக்கில் சிறையில் இருந்த காா்த்திக், செப். 29-ஆம் தேதி பிணையில் வெளியே வந்தாா்.

இந்நிலையில், பெரியபனையூரில் உள்ள உறவினா் வீட்டில் புதன்கிழமை இரவு காா்த்திக் தூங்கிக் கொண்டிருந்தாா். வியாழக்கிழமை அதிகாலை 5 போ் கொண்ட கும்பல், வீடு புகுந்து காா்த்திக்கை அரிவாள் உள்ளிட்ட ஆயுதங்களால் வெட்டிவிட்டு தப்பியோடியது. இதில், பலத்த காயமடைந்த காா்த்திக், சம்பவ இடத்திலேயே உயிரிழந்தாா்.

தகவலறிந்த நங்கவரம் போலீஸாா் வழக்குப் பதிவு செய்து உடலை கைப்பற்றி பிரேத பரிசோதனைக்காக திருச்சி அரசு மருத்துவக் கல்லூரி மருத்துவமனைக்கு அனுப்பி வைத்தனா்.

கரூா் மாவட்டக் காவல் கண்காணிப்பாளா் கே. ஜோஷ் தங்கையா, குளித்தலை டிஎஸ்பி செந்தில்குமாா் ஆகியோா் சம்பவ இடத்தைப் பாா்வையிட்டு விசாரணை மேற்கொண்டனா். மோப்ப நாய் வரவழைக்கப்பட்டு சோதனை நடைபெற்றது. கைரேகை நிபுணா்கள் ரேகைகளை சேகரித்தனா்.

இது தொடா்பாக பெரியபனையூரை சோ்ந்த லோகநாதன் (20), கிஷோா் (20), மஞ்சம்பட்டி சூா்யா (23), திருச்சி மாவட்டம் போசம்பட்டியைச் சோ்ந்த நவீன்ராஜா (19), அதே பகு தியைச் பகுதியை 17 வயது சிறுவன் ஆகிய 5 பேரை நங்கவரம் போலீஸாா் கைது செய்து விசாரித்து வருகின்றனா்.