ஊரக வளா்ச்சித் துறையின் வளா்ச்சித் திட்டப் பணிகள் குறித்த ஆய்வுக் கூட்டம்

ஊரக வளா்ச்சித் துறையின் சாா்பில் நடைபெற்று வரும் வளா்ச்சித் திட்டப் பணிகள் குறித்த ஆய்வுக் கூட்டம் புதன்கிழமை நடைபெற்றது.

மாவட்ட ஆட்சியா் அலுவலக கூட்டரங்கில் புதன்கிழமை நடைபெற்ற இந்த ஆய்வுக் கூட்டத்தில் மாவட்ட ஆட்சியா் மனீஷ் பேசியதாவது:

திருப்பூா் மாவட்டத்தில் ஊரக வளா்ச்சித் துறையின் சாா்பில் செயல்படுத்தப்பட்டு வரும் பல்வேறு திட்டப் பணிகள் குறித்து துறை சாா்ந்த அலுவலா்களுடான ஆய்வுக் கூட்டம் நடத்தப்பட்டது. இக்கூட்டத்தில் ஊரக வீடுகள் பழுது பாா்க்கும் திட்டம், மகாத்மா காந்தி தேசிய ஊரக வேலை உறுதித் திட்டம், நமக்கு நாமே திட்டம், அண்ணா மறுமலா்ச்சித் திட்டம், பள்ளி உள்கட்டமைப்பு மேம்பாட்டுத் திட்டம், இலங்கைத் தமிழா் மறுவாழ்வு முகாம், ஊரக பகுதிகளில் பாரத பிரதமரின் வீடு வழங்கும் திட்டம், சட்டப் பேரவை உறுப்பினா் தொகுதி மேம்பாட்டுத் திட்டம், 15-ஆவது நிதிக்குழு மானியத் திட்டத்தின் கீழ் செயல்படுத்தப்படும் திட்டங்கள், சாலை வசதிகள் உள்ளிட்ட அடிப்படை வசதிகள் ஆகியவை குறித்து விரிவாக ஆய்வு மேற்கொள்ளப்பட்டது.

இக்கூட்டத்தில், நடைபெற்று வரும் திட்டப் பணிகளை விரைந்து முடிக்கவும், புதிய திட்டப் பணிகளுக்கு திட்ட மதிப்பீடு தயாா் செய்யவும் அலுவலா்களுக்கு அறிவுறுத்தப்பட்டதாகத் தெரிவித்தாா்.

இதில் ஊரக வளா்ச்சி முகமையின் திட்ட இயக்குநா் கோ.மலா்விழி, செயற்பொறியாளா் மோகனசுந்தரம் உள்ளிட்ட அனைத்துத் துறை அலுவலா்கள் கலந்து கொண்டனா்.