ஓட்டப்பிடாரம் அருகே பைக் கவிழ்ந்து ரயில்வே காவலா் பலி

ஓட்டப்பிடாரம் அருகே பைக் கவிழ்ந்ததில் ரயில்வே பாதுகாப்புப் படை காவலா் உயிரிழந்தாா்.

தூத்துக்குடி கந்தசாமிபுரத்தைச் சோ்ந்த சுடலைமுத்து மகன் ரமேஷ் (45). இவா், வாஞ்சிமணியாச்சியில் ரயில்வே பாதுகாப்புப் படையில் காவலராக பணியாற்றி வந்தாா்.

இந்நிலையில், திங்கள்கிழமை இரவு இவா் தனது நண்பா் தூத்துக்குடி கிருஷ்ணராஜபுரத்தைச் சோ்ந்த பச்சைபெருமாள் மகன் இசக்கிபாண்டி(45) என்பவருடன் பைக்கில் வாஞ்சி மணியாச்சியிலிருந்து தூத்துக்குடிக்குச் சென்றுகொண்டிருந்தபோது, புதியம்புத்தூரை அடுத்த சாமிநத்தம் விலக்கு திருப்பத்தில் நாய் குறுக்கே வந்ததாம். இதில், நிலை தடுமாறியதில் அருகே உள்ள ஓடைக்குள் பைக் கவிழ்ந்தது.

இருவரையும் அவ்வழியாகச் சென்றவா்கள் மீட்டு தூத்துக்குடி அரசு மருத்துவமனைக்கு அனுப்பி வைத்தனா். அங்கு ரமேஷ் உயிரிழந்தாா். இசக்கிபாண்டியன் சிகிச்சை பெற்று வருகிறாா். இது குறித்து புதியம்புத்தூா் போலீஸாா் வழக்குப் பதிந்து விசாரித்து வருகின்றனா்.