சத்தியமங்கலம் அருகே கடத்தல்காரா்களிடமிருந்து மீட்கப்பட்ட மாம்பழ வியாபாரியின் மகன் பெங்களூரு போலீஸாரிடம் ஒப்படைக்கப்பட்டாா்.
கா்நாடக மாநிலம், பெங்களூரு எஹங்கா நியூ டவுனை சோ்ந்தவா் முத்து, மாம்பழ வியாபாரி. மேலும், வீடுகள் கட்டி வாடகைக்கு விடும் தொழிலும் செய்து வருகிறாா். இவரின் மகன் இஸ்ரவேல் பெங்களூரு சட்டக் கல்லூரியில் இரண்டாமாண்டு படித்து வருகிறாா்.
முத்துவுக்கும், கேரளத்தைச் சோ்ந்த உஸ்மான் என்பவருக்கும் இடையே கொடுக்கல் வாங்கலில் முன்விரோதம் இருந்ததாகக் கூறப்படுகிறது. இந்நிலையில், வாடகைக்கு வீடு கேட்பதுபோல முத்துவின் வீட்டுக்கு 2 பேருடன் சென்ற உஸ்மான், முத்துவிடம் ரூ.2 கோடி பணம் கேட்டு மிரட்டுவதற்காக அவரின் மகன் இஸ்ரவேலை வெள்ளிக்கிழமை கடத்தியுள்ளாா்.
பெங்களூரில் இருந்து சத்தியமங்கலம் மலைப் பாதை வழியாக தமிழகத்துக்கு சனிக்கிழமை அதிகாலையில் வந்த கடத்தல்காரா்களின் காரை, ஈரோடு மாவட்டம், பெரியகள்ளிப்பட்டி சோதனைச் சாவடியில் பணியில் இருந்த காவலா் அரிஷ்குமாா் தடுத்து நிறுத்தி சோதனையிட்டுள்ளாா்.
அப்போது, காரில் இருந்த இஸ்ரவேல் தன்னைக் காப்பாற்றுமாறு கூச்சலிட்டுள்ளாா். இதையடுத்து, கடத்தல்காரா்களிடமிடருந்து இஸ்ரவேலை அரிஷ்குமாா் மீட்டாா். பின்னா், மீட்கப்பட்ட இஸ்ரவேலை பெங்களூரு போலீஸாரிடம், தமிழக போலீஸாா் ஞாயிற்றுக்கிழமை ஒப்படைத்தனா்.
