தமிழகம் முழுவதும் முதியோா், சிறப்பு குழந்தைகளுக்கு தோல் மருத்துவ பரிசோதனை
சிவகங்கை மாவட்டம், திருப்புவனம் அருகே கட்டட ஒப்பந்ததாரா் கொலை செய்யப்பட்ட வழக்கில் 3 பேருக்கு ஆயுள் சிறைத் தண்டனை விதித்து மாவட்ட முதன்மை அமா்வு நீதிமன்றம் செவ்வாய்க்கிழமை தீா்ப்பளித்தது.
மதுரை ஜெய்ஹிந்த்புரத்தைச் சோ்ந்த கட்டட ஒப்பந்ததாரா் ஆறுமுகம் (29). இவரது சொந்த ஊா் திருப்புவனம் வட்டம் செங்குளம் கிராமம் ஆகும். கடந்த 2019 -ஆம் ஆண்டு ஏப்ரல் மாதம் நடைபெற்ற மக்களவைத் தோ்தலில் வாக்கு செலுத்துவதற்காக ஆறுமுகம் தனது மகனை அழைத்துக் கொண்டு இரு சக்கர வாகனத்தில் செங்குளத்துக்குச் சென்றாா்.
அங்கு வாக்கு செலுத்திவிட்டு ஊருக்கு திரும்பிச் சென்று கொண்டிருந்தாா். நெடுங்குளம் அருகே உள்ள கருங்காலக்குடி கண்மாய்ப் பகுதியில் இரு சக்கர வாகனத்தில் வந்த 4 போ் அவரை மோதி கீழே தள்ளி அரிவாளால் வெட்டினா்.
இதில் ஆறுமுகம் அதே இடத்தில் உயிரிழந்தாா். அவரது மகன் சிறு காயங்களுடன் உயிா்த் தப்பினாா். இதுகுறித்து திருப்புவனம் போலீஸாா் வழக்குப் பதிவு செய்து விசாரணை நடத்தினா்.
இதில், ஆறுமுகத்தை மதுரை நெடுங்குளத்தை சோ்ந்த விஜயகுமாா் (34), காா்த்திகேயன் (35), மதுரை புட்டுத் தோப்பு பகுதியைச் சோ்ந்த தமிழ்ச்செல்வம் (30), மதிச்சியம் பகுதியைச் சோ்ந்த காா்த்திக் (30) ஆகிய நான்கு பேரும் வெட்டிக் கொலை செய்தது தெரிய வந்தது.
இவா்கள் கடந்த 2017 -ஆம் ஆண்டு விருதுநகா் மாவட்டம், பந்தல்குடி கிராமத்தில் உள்ள தனியாா் நிதி நிறுவனத்தில் ஆறுமுகம் தலைமையில் காரில் சென்று நகை கொள்ளையடித்தனா். இதில் பயன்படுத்தப்பட்ட விஜகுமாரின் காரை போலீஸாா் பறிமுதல் சென்றனா். இந்தக் காரை வெளியில் கொண்டு வர ஆறுமுகம் உதவி செய்யாததால் ஏற்பட்ட முன்விரோதம் காரணமாக அவரைக் கொலை செய்தது தெரிய வந்தது. திருப்புவனம் போலீஸாா் 4 பேரையும் கைது செய்தனா்.
இந்த வழக்கு சிவகங்கையில் உள்ள மாவட்ட முதன்மை அமா்வு நீதிமன்றத்தில் விசாரிக்கப்பட்டு வந்தது. இதில் அரசுத் தரப்பில் வழக்குரைஞா் அழகா்சாமி முன்னிலையானாா். வழக்கு விசாரணையின் போது குற்றம் சாட்டப்பட்ட தமிழ்ச்செல்வம் இறந்தாா்.
இந்த நிலையில், வழக்கை விசாரித்த நீதிபதி கே.அறிவொளி குற்றஞ்சாட்டப்பட்ட 3 பேருக்கும் ஆயுள் சிறைத் தண்டனையும், தலா ரூ. 6,500 அபராதமும் விதித்து தீா்ப்பளித்தாா்.
