கோயிலில் பூஜைப் பொருள்கள் திருட்டு

புதுச்சத்திரம் அருகே எஸ்.நாட்டாமங்கலம் பகுதியில் உள்ள அம்மன் கோயிலில் பீரோவை உடைத்து பூஜைப் பொருள்கள் திருடப்பட்டுள்ளன.

எஸ்.நாட்டாமங்கலம் பகுதியில் காண்டி அம்மன் கோயில் உள்ளது. இந்துசமய அறநிலையத் துறைக்கு சொந்தமான இக்கோயில் அப்பகுதியைச் சோ்ந்த ஒரு சமூகத்தினரால் நிா்வகிக்கப்பட்டு வருகிறது. இந்நிலையில், கோயில் பூசாரி கந்தசாமி வழக்கம்போல செவ்வாய்க்கிழமை இரவு கோயிலை பூட்டிச்சென்றாா். புதன்கிழமை காலை கோயிலுக்கு வந்து திறந்துபாா்த்தபோது, அங்கிருந்த பீரோ உடைக்கப்பட்டு அதிலிருந்த பூஜைப் பொருள்களான குத்துவிளக்கு, கோயில் மணி, பித்தளைக் குடம், ஆரத்தி விளக்கு, பொங்கல் பாத்திரம், வெண்கல மணி உள்ளிட்ட ரூ. 10 ஆயிரம் மதிப்பிலான பொருள்கள் திருட்டு போனது தெரியவந்தது. புகாரின் பேரில், புதுச்சத்திரம் போலீஸாா் வழக்குப் பதிந்து விசாரணை நடத்தி வருகின்றனா்.