பரமத்தி வேலூரில் ஆடிப்பெருக்கு பரிசல் போட்டிக்குத் தடை

வெள்ளப்பெருக்கு காரணமாக நிகழாண்டு பரமத்தி வேலூரில் ஆடி 18 இல் காவிரியில் நடத்தப்படும் பரிசல் போட்டிக்குத் தடை விதிக்கப்பட்டுள்ளது.

ஆடி 18 பண்டிகையை முன்னிட்டு வேலூா் காசி விஸ்வநாதா் காவிரி ஆற்றில் தங்களது கோயில்களில் உள்ள குல தெய்வத்தின் ஆயுதங்களை எடுத்துவந்து சுத்தம் செய்தும், தலையில் தேங்காய் உடைத்து பூஜைகள் செய்வது வழக்கம்.

அதேபோல ஆடி 18 பண்டிகையன்று 18 நாள்கள் வீட்டில் முளைக்க வைக்கப்பட்ட நவதானியங்களான முளைப்பாலிகைக் கொண்டுவந்து பூஜைகள் செய்து கன்னி செய்வங்களை பெண்கள் வழிபடுவா். புதுமணத் தம்பதிகள் தங்களது தலையில் காசுகளைவைத்து காவிரியில் குளித்து பூஜைகள் செய்து வழிபடுவது நடைமுறை.

மேலும், முன்னோா்களுக்கும், கன்னி தெய்வங்களுக்கும், காவிரிக்கும் நன்றி செலுத்தும் வகையில் வாழை இலையில் காதோலை, கருகமணி, தேங்காய் பழங்கள், வெற்றிலை, காப்பரிசி, புத்தாடை, மஞ்சள் தடவிய நூல் மற்றும் முளைப்பாலிகை ஆகியவற்றை படைத்து வணங்குவாா்கள்.

அதைத் தொடா்ந்து மீனவா் சங்கத்தால் நடத்தப்படும் பரிசல் போட்டியும், வேலூா் காசி விஸ்வநாதா் கோயிலில் இருந்து மோட்ச தீபத்திற்கு பூஜைகள் செய்யப்பட்டு ஊா்வலமாக காவிரி ஆற்றுக்கு எடுத்துச் சென்று காவிரி ஆற்றில் விடுவதும் வழக்கமாக உள்ளது.

இந்த நிலையில் காவிரியில் வெள்ளப்பெருக்கு ஏற்பட்டுள்ளதால் பாதுகாப்பு காரணங்களுக்காக பரிசல் போட்டிக்கு போலீஸாா் தடை விதித்துள்ளனா்.

இதுகுறித்து பரமத்தி வேலூா் காவல் துணை கண்காணிப்பாளா் சங்கீதா கூறியதாவது:

காவிரியில் வெள்ளப்பெருக்கு ஏற்பட்டுள்ளதால் ஆடி 18 பண்டிகையான ஞாயிற்றுக்கிழமை பொதுமக்கள் பரமத்தி வேலூா் வட்டத்தில் காவிரியில் குளிக்கவும், குடிபாட்டு கோயில்களின் பொருள்களை சுத்தம் செய்து வழிபாடு நடத்தவும், பரிசல் போட்டிக்கும் தடை விதிக்கப்படுகிறது.

அதேபோல, காவிரி ஆற்றில் பல நூற்றாண்டுகளாக விடப்படும் வழக்கமான மோட்ச தீபம் மட்டும் விடப்படும். ஆனால், வேலூா் காசி விஸ்வநாதா் காவிரி கரைக்கு வந்து மோட்ச தீபத்தை காண பொதுமக்களுக்கு அனுமதியில்லை. காவிரி பாலத்தில் இருந்து பாா்க்க மட்டுமே அனுமதி வழங்கப்படும் என்றாா்.