கோபி அருகே இணைப்புச் சக்கரம் பொருத்தப்பட்ட இருசக்கர வாகனம் சாலையோர மரத்தில் மோதியதில் மாற்றுத்திறனாளி உயிரிழந்தாா்.
ஈரோடு மாவட்டம், கோபி அருகேயுள்ள அயலூரைச் சோ்ந்தவா் நந்தகுமாா் (33), பெயிண்டா். மாற்றுத்திறனாளியான இவருக்கு திருமணம் ஆகவில்லை.
இந்நிலையில், இணைப்புச் சக்கரம் பொருத்தப்பட்ட இருசக்கர வாகனத்தில் அயலூா்-கொளப்பலூா் சாலையில் நந்தகுமாா் புதன்கிழமை மாலை சென்று கொண்டிருந்தாா்.
சமத்துவபுரம் பகுதி அருகே சென்றபோது சாலையின் குறுக்கே திடீரென நாய் வந்தது. இதனால், அதிா்ச்சி அடைந்த அவா், இருசக்கர வாகனத்தை திருப்ப முயன்றுள்ளாா். அப்போது, கட்டுப்பாட்டை இழந்த வாகனம் சாலையோரம் இருந்த மரத்தில் மோதியது.
இதில், படுகாயம் அடைந்த அவரை, அங்கிருந்தவா்கள் மீட்டு கோபி அரசு மருத்துவமனைக்கு அழைத்துச் சென்றனா். அங்கு அவரைப் பரிசோதித்த மருத்துவா்கள், அவா் ஏற்கெனவே உயிரிழந்துவிட்டதாகத் தெரிவித்தனா்.
இச்சம்பவம் குறித்து சிறுவலூா் போலீஸாா் வழக்குப் பதிவு செய்து விசாரணை நடத்தி வருகின்றனா்.
