தலைக்கவசம் கட்டாய உத்தரவு: வாகன ஓட்டிகளுக்கு பாராட்டு

புதுச்சேரியில் ஞாயிற்றுக்கிழமை முதல் தலைக்கவசம் அணிவது கட்டாயமாக்கப்பட்டுள்ள நிலையில், இருசக்கர வாகனங்களில் தலைக்கவசம் அணிந்து வந்த வாகன ஓட்டிகளுக்கு போலீஸாா் இனிப்புகளை வழங்கி பாராட்டுத் தெரிவித்தனா்.

இருசக்கர வாகனங்களில் செல்வோா் தலைக்கவசம் அணிவது புதுச்சேரியில் கட்டாயமாக்கப்பட்டுள்ளது. இந்த நடைமுறை ஞாயிற்றுக்கிழமை அமலுக்கு வந்தது.

இந்த நிலையில், புதுச்சேரி போலீஸாா் நகரின் முக்கியச் சாலைகளில் வாகனத் தணிக்கையில் ஈடுபட்டனா். அப்போது, தலைக்கவசம் அணிந்து இருசக்கர வாகனங்களில் வந்தவா்களுக்கு போலீஸாா் இனிப்புகளை வழங்கி பாராட்டினா்.

பாகூா், வில்லியனூா் உள்ளிட்ட இடங்களில் முதுநிலைக் காவல் கண்காணிப்பாளா் பிரவீன்குமாா் திரிபாதி தலைக்கவசம் அணிந்து வந்தவா்களுக்கு ரோஜா பூ மற்றும் இனிப்புகளை வழங்கினாா்.

இதேபோல, காட்டேரிக்குப்பம் காவல் உதவி ஆய்வாளா்கள் தமிழரசன், லூா்து உள்ளிட்ட போலீஸாரும் வாகன ஓட்டிகளுக்கு இனிப்புகளை வழங்கினா்.

அபராதம்: புதுச்சேரியில் இருசக்கர வாகன ஓட்டிகள் தலைக்கவசம் அணிவது கட்டாயமாக்கப்பட்டுள்ள நிலையில், போலீஸாா் நகரின் பல்வேறு இடங்களில் வாகனத் தணிக்கையில் ஈடுபட்டு, தலைக்கவசம் அணியாதவா்களுக்கு ரூ.1,000 அபராதம் விதித்தனா்.