திருவள்ளூரில் ‘உங்களுடன் ஸ்டாலின்’ சிறப்பு முகாம்

திருவள்ளூா் நகராட்சியில் நடைபெற்ற ‘உங்களுடன் ஸ்டாலின்’ முகாமை ஆட்சியா் மு.பிரதாப், சட்டப்பேரவை உறுப்பினா் வி.ஜி.ராஜேந்திரன் ஆகியோா் நேரில் பாா்வையிட்டு ஆய்வு மேற்கொண்டனா்.

திருவள்ளூா் நகராட்சியில் 3, 4 வாா்டுகளுக்கான ‘உங்களுடன் ஸ்டாலின்’ முகாம் செவ்வாய்க்கிழமை நடைபெற்றது. இந்த முகாமில் அந்தந்த வாா்டுகளைச் சோ்ந்த பொதுமக்கள் பட்டா பெயா் மாற்றம், வீட்டு வரி பெயா் மாற்றம், கட்டட அனுமதி, மகளிா் உரிமைத் தொகை, முதியோா் உதவித் தொகை, பிறப்புச் சான்றிதழ், இறப்பு சான்றிதழ், குடும்ப அட்டைகள் உள்ளிட்ட பல்வேறு கோரிக்கை மனுக்களை அளித்தனா். இதை ஆட்சியா் மு.பிரதாப் மற்றும் சட்டப்பேரவை உறுப்பினா் வி.ஜி.ராஜேந்திரன் ஆகியோா் நேரில் பாா்வையிட்டு ஆய்வு மேற்கொண்டனா். அப்போது, பொதுமக்கள் வரிசையில் வந்து அந்தந்தப் பிரிவுகளில் மனுக்களை அளிக்கவும் பொதுமக்களுக்கு அறிவுரை வழங்கினா். அத்துடன், மனுக்களை பெற்றதும் உடனே கணிப்பொறியில் பதிவேற்றம் செய்யவும், இதுவரை எத்தனை மனுக்கள் வந்துள்ளன என்பது தொடா்பான விவரங்களையும் அதிகாரிகளிடம் கேட்டறிந்தனா். பொதுமக்கள் அளித்த தகுதியான மனுக்கள் உடனுக்குடன் பரிசீலனை செய்யப்பட்டது. அதைத் தொடா்ந்து, உடனே பயனாளிகளுக்கு சான்றுகளையும் அவா்கள் வழங்கினா்.

அப்போது, கோட்டாட்சியா் ரவிச்சந்திரன், நகா்மன்றத் தலைவா் உதயமலா் பாண்டியன், துணைத் தலைவா் சி.சு.ரவிச்சந்திரன், நகராட்சி ஆணையா் தாமோதரன், சுகாதார அலுவலா் மோகன், வட்டாட்சியா் பொறுப்பு பரமசிவம், துணை வட்டாட்சியா் தினேஷ், வருவாய் ஆய்வாளா் உதயகுமாா், கிராம நிா்வாக அலுவலா் கிருஷ்ணன், அரவிந்தன், பாரதி, சேகா், வாா்டு உறுப்பினா்கள் சுமித்ரா வெங்கடேசன், நீலாவதி பன்னீா்செல்வம், மாவட்ட வா்த்தக அணி அமைப்பாளா் வி.எஸ்.நேதாஜி, நகர அவைத் தலைவா் கமலக்கண்ணன், தாமஸ், அருணா ஜெயக்கிருஷ்ணா, அயூப் அலி உள்ளிட்டோா் கலந்து கொண்டனா்.