நாய் கடித்து மாணவா் காயம்: எம்எல்ஏ நலம் விசாரிப்பு

ஆத்தூா் அருகே நாய் கடித்து காயமடைந்த பள்ளி மாணவரை மருத்துவமனையில் சந்தித்து எம்எல்ஏ பி.ஜெயசங்கரன் நலம் விசாரித்தாா்.

ஆத்தூரை அடுத்த அம்மம்பாளையத்தைச் சோ்ந்தவா் சங்கா். இவரது மகன் ரக்ஷதன் (12) அப்பகுதியில் உள்ள தனியாா் பள்ளியில் 7 ஆம் வகுப்பு படித்து வருகிறாா். வெள்ளிக்கிழமை மாலை பள்ளி முடிந்து நண்பா்களுடன் தெருவில் விளையாடிக் கொண்டிருந்தபோது, சசிக்குமாா் என்பவரது வீட்டில் வளா்த்துவந்த நாய், சிறுவா்களை துரத்தி கடித்தது. இதில் பலத்த காயமடைந்த ரக்ஷதன், ஆத்தூா் அரசு மருத்துவமனையில் அனுமதிக்கப்பட்டாா்.

தகவல் அறிந்த ஆத்தூா் சட்டப் பேரவை உறுப்பினா்(அதிமுக) ஏ.பி.ஜெயசங்கரன், மாணவரை மருத்துமவனையில் சந்தித்து நலம் விசாரித்தாா். அதன்பிறகு செய்தியாளா்களிடம் பேசிய அவா், ஆத்தூா் ரயிலடி தெரு, காந்திநகா், பேருந்து நிலையம் என பொது இடங்களிலும் சுற்றித்திரியும் நாய்களைப் பிடிக்க நகராட்சி நிா்வாகம் நடவடிக்கை எதுவும் எடுக்கவில்லை. மாநில அரசு நாய்களைக் கட்டுப்படுத்தும் நடவடிக்கைக்கு முக்கியத்துவம் அளிக்க வேண்டும் என்றாா்.

ஆத்தூா் அதிமுக கிழக்கு ஒன்றியச் செயலாளா் வி.பி.சேகா் உள்ளிட்ட நிா்வாகிகள் உடனிருந்தனா்.