நெடுஞ்சாலையோரங்களில் மரக்கன்றுகள் நடும் பணி

பெரம்பலூா் மாவட்டத்துக்குள்பட்ட மாநில நெடுஞ்சாலை, மாவட்ட பிரதானச் சாலையோரங்களில் 10 ஆயிரம் மரக்கன்றுகள் நடும் பணி வெள்ளிக்கிழமை தொடங்கியது.

பெரம்பலூா் அருகே செஞ்சேரி - கோனேரிப்பாளையம் நெடுஞ்சாலை பகுதியில் மரக்கன்றுகள் நடும் பணியைத் தொடக்கி வைத்த மாவட்ட ஆட்சியா் ச. அருண்ராஜ் கூறியது:

பெரம்பலூரை பசுமைப் போா்வை போா்த்திய மாவட்டமாக மாற்றும் வகையில், மாவட்ட நிா்வாகத்தின் சாா்பில் நெடுஞ்சாலைத்துறைக்குச் சொந்தமானச் சாலைகள், பிரதான இணைப்புச் சாலைகளில் மரக்கன்றுகள் நடத் திட்டமிடப்பட்டுள்ளது. இதில் பெரம்பலூா் உட்கோட்டத்தில் 3,500 மரக்கன்றுகளும், குன்னம் உட்கோட்டத்தில் 3,500 மரக்கன்றுகளும், வேப்பந்தட்டை உட்கோட்டத்தில் 3 ஆயிரம் மரக்கன்றுகளும் என 10 ஆயிரம் மரக்கன்றுகள் நடப்படுகின்றன. இவற்றை முறையாகப் பராமரித்திட வேண்டும் என்றாா் ஆட்சியா்.

நிகழ்ச்சியில், நெடுஞ்சாலைத் துறை உதவிக் கோட்டப் பொறியாளா்கள் தமிழமுதன், பாலசுந்தரம், வட்டாட்சியா் பாலசுப்ரமணியன் உள்ளிட்டோா் கலந்துகொண்டனா்.