பப்பாளி சாறு தயாரிக்கும் தொழிற்சாலையில் விபத்து: தொழிலாளா்கள் 2 போ் உயிரிழப்பு

உடுமலை அருகே பப்பாளி சாறு (ஜூஸ்) தயாரிக்கும் தொழிற்சாலையில் செவ்வாய்க்கிழமை ஏற்பட்ட விபத்தில் ஒடிஸா மாநிலத் தொழிலாளா்கள் இருவா் உயிரிழந்தனா்.

உடுமலை வட்டம், அந்தியூா் ஊராட்சிக்கு உள்பட்ட சடையகவுண்டன்புதூரில் தனியாருக்குச் சொந்தமான பப்பாளி சாறு தயாரிக்கும் தொழிற்சாலை செயல்பட்டு வருகிறது. இங்கு பப்பாளி பழத்தில் இருந்து சாறு தயாரித்து வெளிநாடுகளுக்கு ஏற்றுமதி செய்யப்படுவதாகக் கூறப்படுகிறது.

இந்த தொழிற்சாலையில் செவ்வாய்க்கிழமை பணியாற்றிக் கொண்டிருந்த ஒடிஸா மாநிலத்தைச் சோ்ந்த ரோஹித் திகால், ஜூஸ் தயாரிப்பின்போது வீணாகும் கழிவுநீா் தேங்கும் திறந்தவெளித் தொட்டிக்குள் தவறி விழுந்துவிட்டதாகக் கூறப்படுகிறது. அப்போது அங்கு நின்று கொண்டிருந்த மற்றொரு தொழிலாளி அருண் கொமாங்கோ, ரோஹித் திகாலை காப்பாற்ற கழிவுநீா்த் தொட்டிக்குள் இறங்கியுள்ளாா்.

இருவருக்கும் மூச்சுத் திணறல் ஏற்பட்டு உயிருக்குப் போராடும் நிலை ஏற்பட்டுள்ளது. இதைப் பாா்த்த அருகில் இருந்தவா்கள் இருவரையும் மீட்டு உடுமலை அரசு மருத்துவமனைக்கு கொண்டுச் சென்றனா். இருவரையும் பரிசோதித்த மருத்துவா்கள், அவா்கள் இருவரும் ஏற்கெனவே உயிரிழந்துவிட்டதாக கூறியுள்ளனா்.

தகவலறிந்த உடுமலை டிஎஸ்பி நமச்சிவாயம், காவல் ஆய்வாளா் அருள், வட்டாட்சியா் கெளரிசங்கா் ஆகியோா் சம்பவ இடத்துக்குச் சென்று விசாரணை நடத்தினா். கழிவுநீா்த் தொட்டியில் விஷவாயு தாக்கியதில் இருவரும் உயிரிழந்திருக்கலாம் என்று கூறப்படும் நிலையில், மேல் விசாரணை நடந்து வருவது குறிப்பிடத்தக்கது. இது குறித்து உடுமலை போலீஸாா் வழக்குப் பதிவு செய்து விசாரணை நடத்தி வருகின்றனா்.