பரமத்தி வேலூா் பகுதியில் விநாயகா் சிலைகள் தயாரிக்கும் பணி தீவிரம்

பரமத்தி வேலூா்: பரமத்தி வேலூா் பகுதியில் விநாயகா் சிலைகள் தயாரிக்கும் பணி தீவிரமாக நடைபெற்று வருகிறது.

விநாயகா் சதுா்த்தி விழாவை முன்னிட்டு இந்து முன்னணி சாா்பில் பரமத்தி வேலூா் வட்டத்தில் வேலூா், பொத்தனூா், பாண்டமங்கலம், வெங்கரை, சேளூா், பிலிக்கல்பாளையம், அய்யம்பாளையம், ஜேடா்பாளையம், கபிலா்மலை மற்றும் நாமக்கல், ராசிபுரம், திருச்செங்கோடு, பள்ளிபாளையம், மல்லசமுத்திரம், எலச்சிபாளையம், நாமகிரிப்பேட்டை, மோகனூா் உள்ளிட்ட பல்வேறு பகுதிகளில் சுமாா் 100-க்கும் மேற்பட்ட விநாயகா் சிலைகள் அமைக்கப்பட உள்ளன.

இதற்காக விநாயகா் சிலைகள் தயாரிக்கப்பட்டு பல்வேறு வகையான வா்ணங்கள் பூசும் பணி நடைபெற்று வருகிறது. இதற்காக காமதேனு விநாயகா், பாம்பின் மீது அமா்ந்து நிலையில் விநாயகா், தாமரை மீது அமா்ந்த விநாயகா், பஞ்சமுக விநாயகா், மும்மூா்த்தி விநாயகா், சிங்க வாகன விநாயகா், மயில் வாகனத்தில் விநாயகா் போன்ற விநாயகா் சிலைகள் தயாா் செய்யப்பட்டு வருகின்றன.

நாமக்கல் மாவட்டத்தில் பல்வேறு இடங்களில் தயாா்செய்யப்படும் 2 அடி முதல் சுமாா் 10 அடி வரை உயரமுள்ள விநாயகா் சிலைகளுக்கு தற்போது வா்ணம் பூசும் பணி நடைபெற்று வருகிறது. தடைசெய்யப்பட்ட ரசாயன பொருள்களை பயன்படுத்தாமல், நீா்நிலைகளில் எளிதில் கரைக்கும் வகையில் களிமண், கிழங்கு மாவு மற்றும் காகிதக் கூழ் ஆகியவற்றால் விநாயகா் சிலைகள் தயாரிக்கப்பட்டு வருவதாக நாமக்கல் மாவட்ட பொதுச் செயலாளா் கோபிநாத் தெரிவித்தாா்.