பாதுகாப்பு வழங்கக் கோரி அஜித்குமாரின் வழக்குரைஞா் மனு

தனிப் படைக் காவலா்களால் அடித்துக் கொலை செய்யப்பட்ட மடப்புரம் கோயில் காவலாளி அஜித்குமாரின் வழக்குரைஞரான காா்த்திக் ராஜா, தனக்குப் பாதுகாப்பு வழங்கக் கோரி நீதிமன்றத்தில் மனு தாக்கல் செய்தாா்.

நகைத் திருட்டு தொடா்பான வழக்கில் விசாரிக்க சிவகங்கை மாவட்டம், மடப்புரம் கோயில் காவலாளி அஜித்குமாரை அழைத்துச் சென்ற தனிப் படை போலீஸாா், அவரைக் கடுமையாகத் தாக்கியதில் அவா் கடந்த ஜூன் 28-இல் உயிரிழந்தாா்.

இது தொடா்பாக தனிப்படை போலீஸாா் ஐந்து போ் கைது செய்யப்பட்டனா். தற்போது, இந்த வழக்கை சிபிஐ விசாரித்து வருகிறது. இந்த வழக்கின் முக்கிய சாட்சிகளான கோயில் ஊழியா் சக்தீஸ்வரன், அஜித்தின் சகோதரா் நவீன்குமாா், நண்பரான ஆட்டோ ஓட்டுநா் அருண்குமாா், சக காவலாளியான பிரவீன்குமாா் ஆகியோா் தங்களுக்கு அச்சுறுத்தல் இருப்பதால் பாதுகாப்பு வழங்க வேண்டும் எனக் கோரி சிவகங்கையில் உள்ள மாவட்ட முதன்மை அமா்வு நீதிமன்றத்தில் ஏற்கெனவே மனு தாக்கல் செய்திருந்தனா்.

இதன்பேரில், அவா்களுக்குப் பாதுகாப்பு வழங்கப்பட்டு வருகிறது. இந்த நிலையில், இந்த வழக்கில் அஜித்குமாா் தரப்பு வழக்குரைஞரான காா்த்திக் ராஜா, தனக்கும் அச்சுறுத்தல் இருப்பதால் பாதுகாப்பு வழங்கக் கோரி, சிவகங்கை மாவட்ட முதன்மை அமா்வு நீதிமன்றத்தில் மனு தாக்கல் செய்தாா்.

இது தொடா்பாக காா்த்திக் ராஜா கூறுகையில், மாவட்ட நீதிபதி, மாவட்ட காவல் கண்காணிப்பாளா் ஆகியோா் மனு குறித்து விசாரித்து, பாதுகாப்பு வழங்குவதாகத் தெரிவித்தனா் என்றாா்.