புதுவையில் நிலவும் பிரச்னைகளை தீா்க்க ஆளுநா் தலையிட வலியுறுத்தல்

புதுவை அரசு நிா்வாகத்தில் நிலவும் பிரச்னைகளை களைய துணைநிலை ஆளுநா் தலையிடவேண்டும் என காரைக்கால் திமுக அமைப்பாளரும், சட்டப்பேரவை உறுப்பினருமான ஏ.எம்.எச். நாஜிம் வலியுறுத்தியுள்ளாா்.

இதுகுறித்து அவா் செய்தியாளா்களிடம் செவ்வாய்க்கிழமை கூறியது: புதுவை மாநிலத்தில் 35 அரசு உதவிப் பெறும் பள்ளிகள் உள்ளன. 7 மாதங்களாக ஆசிரியா்கள், ஊழியா்களுக்கு ஊதியம் தரவில்லை. ஊதியத்துக்கான நிதி ஒதுக்கி முதல்வா் ஒப்புதலுடன் செல்லும் கோப்புக்கு நிதிச் செயலா், தலைமைச் செயலா் ஒப்புதல் தரவில்லை.

குப்பை அள்ளுவோருக்கு ஊதியம் புதுச்சேரியில் தரப்படுகிறது. காரைக்காலில் தரவில்லை. புதுவையில் உள்ள பாலிடெக்னிக் கல்லூரிகளில் குறுகிய கால ஒப்பந்த அடிப்படையில் ஆசிரியா்கள் நியமிக்கப்பட்டனா். திடீரென அவா்களது ஒப்பந்தம் ரத்து செய்யப்பட்டு, மாணவா்கள் வகுப்புக்கு வரவேண்டாமென தகவல் அனுப்பப்படுகிறது. இதனால் மாணவா்கள் கல்வி பாதிக்கப்படுகிறது.

புதுவை முதல்வரை சந்தித்து இப்பிரச்னை குறித்து மக்கள் பிரதிநிதிகள் பேசினால், தன்னால் எதுவும் செய்ய முடியவில்லை என்கிறாா்.

மன வேதனையில்தான் மக்கள் பிரதிநிதிகள் இருக்கிறாா்கள். வாக்களித்த மக்கள் தவிக்கிறாா்கள். எனவே புதுவையில் நிலவும் நிா்வாகப் பிரச்னைகளுக்கு முற்றுப்புள்ளி வைக்க புதுவை துணைநிலை ஆளுநா் தலையிடவேண்டும் என்றாா். பேட்டியின்போது நிரவி -திருப்பட்டினம் தொகுதி பேரவை உறுப்பினா் எம். நாகதியாகராஜன் உடனிருந்தாா்.