மருத்துவ மாணவி உயிரிழந்த விவகாரம்: விசாரணை அறிக்கை கோரியது தேசிய தாழ்த்தப்பட்டோா் ஆணையம்

கோவையில் மருத்துவ மாணவி உயிரிழந்த விவகாரத்தில் விசாரணை அறிக்கையை சமா்ப்பிக்குமாறு தேசிய தாழ்த்தப்பட்டோா் ஆணையம் மாவட்ட ஆட்சியருக்கு கோரிக்கை விடுத்துள்ளது.

கோவையில் உள்ள தனியாா் மருத்துவக் கல்லூரியில் முதுநிலை மயக்கவியல் துறையில் பயின்று வந்தவா் பவபூரணி (29). நாமக்கம் மாவட்டம், வகுரம்பட்டி பகுதியைச் சோ்ந்த இவா், கல்லூரி வளாகத்தில் உள்ள விடுதியில் தங்கியிருந்தாா்.

இந்த நிலையில், பவபூரணியின் சடலம் கடந்த ஞாயிற்றுக்கிழமை கழிப்பறையில் இருந்து மீட்கப்பட்டது. தந்தை கந்தசாமி அளித்த புகாரின் அடிப்படையில், அவா் தற்கொலை செய்து கொண்டாரா? இதய வலியால் உயிரிழந்தாரா என்ற கோணத்தில் பீளமேடு போலீஸாா் விசாரணை நடத்தி வருகின்றனா்.

அவரது உடற்கூறாய்வுக்குப் பிறகு சொந்த ஊரான நாமக்கல்லுக்கு திங்கள்கிழமை இரவு கொண்டுச் செல்லப்பட்டது. உடற்கூறாய்வு அறிக்கை வந்த பிறகே மாணவி எப்படி இறந்தாா் என்று தெரியவரும் என போலீஸாா் செவ்வாய்க்கிழமை தெரிவித்தனா்.

கல்லூரியில் மா்மமான முறையில் உயிரிழந்த மாணவி தாழ்த்தப்பட்ட சமுதாயத்தைச் சோ்ந்தவா் என்பதால், தேசிய தாழ்த்தப்பட்டோா் ஆணையம் தாமாக முன்வந்து விசாரணை நடத்த முடிவு செய்துள்ளது. இதுகுறித்த அறிக்கையைச் சமா்ப்பிக்குமாறு தேசிய தாழ்த்தப்பட்டோா் ஆணையத் தலைவா் ரவிவா்மன், மாவட்ட ஆட்சியருக்கு குறிப்பாணை (நோட்டீஸ்) அனுப்பியுள்ளாா்.

இந்த சம்பவத்தில் காவல் ஆணையரால் நடத்தப்பட்ட விசாரணை, எஸ்சிஎஸ்டி விதியின் கீழ் மாணவிக்கு வழங்கப்பட்ட இழப்பீட்டுத் தொகை உள்ளிட்ட விவரங்களை 5 நாள்களுக்குள் அளிக்க வேண்டும் என அந்தக் குறிப்பாணையில் தெரிவிக்கப்பட்டுள்ளது.

ஆட்சியரகத்தில் மனு

மருத்துவ மாணவியின் இறப்பு குறித்து விரைவாக விசாரணை நடத்த உத்தரவிடக் கோரி, இந்திய மாணவா் சங்கம், இந்திய ஜனநாயக வாலிபா் சங்கம், தமிழ்நாடு தீண்டாமை ஒழிப்பு முன்னணி ஆகியவற்றின் சாா்பில் கோவை மாவட்ட ஆட்சியா் அலுவலகத்தில் செவ்வாய்க்கிழமை மனு அளிக்கப்பட்டது.