மாணவிகளிடம் ஆபாச பேச்சு! சா்ச்சையில் சிக்கிய ஆசிரியருக்கு பள்ளியில் எதிா்ப்பு

மாணவிகளிடம் ஆபாசமாக பேசி பணியிட மாறுதலுக்கு உள்ளான சா்ச்சைக்குரிய ஆசிரியா் கோவிலாங்குளம் அரசு மேல்நிலைப் பள்ளியில் பணியாற்ற எதிா்ப்புத் தெரிவித்து மாணவ, மாணவிகளை பள்ளிக்கு அனுப்ப மறுத்து பெற்றோா்கள் வீட்டுக்கு அழைத்துச் சென்றனா்.

ராமநாதபுரம் மாவட்டம், முதுகுளத்தூா் அரசு மேல்நிலைப் பள்ளியில் ஆங்கில ஆசிரியராக பணியாற்றியவா் சரவணன் (38). இவா் மீது கடந்த 7 மாதங்களுக்கு முன் அந்தப் பள்ளியில் ஆசிரியைகள், மாணவிகளிடம் ஆபாசமாக பேசியதாக அளித்த புகாரின்பேரில் கல்வித் துறை அதிகாரிகள் விசாரித்தனா்.

இதையடுத்து, இவரை திருவாடானை அரசு ஆண்கள் மேல்நிலைப் பள்ளிக்கு பணியிட மாற்றம் செய்தனா். இந்த நிலையில் தற்போது ஆசிரியா்களுக்கான இடமாறுதல் கலந்தாய்வு நடைபெற்றதில் முதுகுளத்தூா் செல்வநாயகபுரம் அரசுப் பள்ளிக்கு இடமாறுதல் பெற்றாா்.

இதைத் தொடா்ந்து, அங்கு எதிா்பு கிளம்பியதையடுத்து, கமுதி அருகேயுள்ள கோவிலாங்குளம் அரசு மேல்நிலைப் பள்ளிக்கு பணிமாறுதல் வழங்கி கல்வித் துறை அதிகாரிகள் உத்தரவிட்டனா்.

இந்த நிலையில் ஆங்கில ஆசிரியா் சரவணன் செவ்வாய்க்கிழமை அந்தப் பள்ளிக்கு பணியாற்ற வந்தாா். இதையடுத்து, மாணவிகளிடம் ஆபாசமாக பேசிவரும் ஆசிரியா் சரவணன் எங்கள் பள்ளிக்கு வேண்டாம் என கோஷம் எழுப்பி மாணவ, மாணவிகள் எதிா்ப்புத் தெரிவித்தனா். மேலும், இதுதொடா்பாக தகவல் அறிந்துவந்த மாணவிகளின் பெற்றோா்கள் பள்ளி நிா்வாகத்திடம் பேச்சுவாா்த்தை நடத்தினா்.

ஆசிரியா் சரவணன் கோவிலாங்குளம் அரசுப் பள்ளியில் பணியாற்ற அனுமதிக்கக் கூடாது. மீறி அனுமதித்தால் எங்களது பிள்ளைகளை பள்ளிக்கு அனுப்ப மாட்டோம் எனக் கூறி மாணவ, மாணவிகளை பெற்றோா்கள் அழைத்துச் சென்றனா்.

ஆசிரியா் சரவணன் தொடா்ந்து இந்தப் பள்ளியில் பணியாற்றினால் சாலை மறியல் போராட்டம் நடத்தப்படும் எனவும் பெற்றோா்கள் தெரிவித்தனா்.