திருவண்ணாமலை ஊராட்சி ஒன்றியத்தைச் சோ்ந்த காட்டாம்பூண்டி ஊராட்சி அரசு மேல்நிலைப் பள்ளியில் ரூ.ஒரு கோடியே 28 லட்சம் மதிப்பில் பொதுப்பணிகள், நெடுஞ்சாலைகள் மற்றும் சிறு துறைமுகங்கள் துறை அமைச்சா் எ.வ.வேலு செவ்வாய்கிழமை திறந்து வைத்தாா்.
தமிழக அரசு பள்ளிக் கல்வித் துறைக்கு பல்வேறு புதிய திட்டங்களை அறிவித்து செயல்படுத்தியும், உள்கட்டமைப்பு வசதிகளை மேம்படுத்தியும் வருகிறது.
மேலும், திருவண்ணாமலை மாவட்டத்தில் கல்வித் துறைக்கு பல புதிய பள்ளிக் கட்டடங்கள் கட்டப்பட்டு திறந்து வைக்கப்பட்டு வருகின்றன.
அதன்படி, திருவண்ணாமலை ஊராட்சி ஒன்றியத்துக்கு உள்பட்ட காட்டாபூண்டி ஊராட்சி அரசு மேல்நிலைப் பள்ளியில் ரூ. ஒரு கோடியே 28 லட்சத்தில் கூடுதலாக 6 வகுப்பறைகள் கொண்ட கட்டடம் கட்டப்பட்டது.
இந்த புதிய வகுப்பறைக் கட்டடத்தை திறந்துவைக்கும் நிகழ்ச்சி செவ்வாய்க்கிழமை நடைபெற்றது.
இதில், பொதுப்பணி, நெடுஞ்சாலை மற்றும் சிறு துறைமுகங்கள் துறை அமைச்சா் எ.வ.வேலு சிறப்பு விருந்தினராக கலந்துகொண்டு, கட்டடத்தை திறந்து வைத்து, குத்துவிளக்கேற்றி பயன்பாட்டுக்கு கொண்டு வந்து வகுப்பறைகளை பாா்வையிட்டாா்.
இந்தக் கட்டடம் தரைதளம் மற்றும் முதல் தளம் 2,484.00 சதுர அடியில் அமைந்துள்ளது.
நிகழ்ச்சியில் மாவட்ட ஆட்சியா் க.தா்ப்பகராஜ் தலைமை வகித்தாா்.
மாநில தடகள சங்கத்தின் துணைத் தலைவா் எ.வ.வே.கம்பன், மாவட்ட முதன்மைக் கல்வி அலுவலா் சுவாமி முத்தழகன், பொதுப்பணித் துறை செயற்பொறியாளா் க.கௌதமன், திமுகவைச் சோ்ந்த முன்னாள் நகா்மன்றத் தலைவா் இரா.ஸ்ரீதரன் மற்றும் அரசுத் துறை சாா்ந்த அலுவலா்கள் கலந்து கொண்டனா்.
