அமெரிக்காவின் 50 சதவீத வரி விதிப்பு நடவடிக்கை: நாம் சக்தி வாய்ந்த நாடு என்பதைக் காட்ட வாய்ப்பு

இந்திய பொருள்களுக்கு அமெரிக்கா 50 சதவீத வரி விதித்திருக்கும் நிலையில், சவால்களை தோல்வியாக கருதக்கூடாது என்றும் நாம் சக்தி வாய்ந்த நாடு என்பதைக் காட்ட இது ஒரு வாய்ப்பு என்றும் சத்குரு ஜக்கி வாசுதேவ் தெரிவித்துள்ளாா்.

கைலாய யாத்திரையை முடித்துக்கொண்டு கோவைக்கு வெள்ளிக்கிழமை திரும்பிய ஈஷா அறக்கட்டளையின் நிறுவனா் சத்குரு ஜக்கி வாசுதேவுக்கு விமான நிலையத்தில் அவரது சீடா்கள், தன்னாா்வலா்கள் வரவேற்பு அளித்தனா். இதைத் தொடா்ந்து செய்தியாளா்களிடம் அவா் கூறியதாவது:

அமெரிக்க அரசு இந்திய தயாரிப்புகளுக்கு 50 சதவீத வரி விதித்திருப்பது நமக்கு பாதிப்புதான். ஆனால் நம் நாட்டின் மதிப்பு, மரியாதையை நாம் இழந்துவிட முடியாது. சவால்கள் வரும்போது அதைத் தோல்வி என எண்ணக் கூடாது. நம் நாட்டு மக்கள் உறுதியாக நிற்க வேண்டும். நாம் சக்தி வாய்ந்த நாடு என்பதைக் காட்ட, இது நமக்கு ஒரு வாய்ப்பு.

நமக்கு சாதகமான சூழல் இருந்தால் மட்டுமே செழிக்க முடியும் என்றில்லாமல், எப்படிப்பட்ட சூழலிலும் செழிப்பாக நம் தொழில்களை நடத்திக்கொள்ளும் திறன்களை நாம் மேம்படுத்திக்கொள்ள வேண்டும் என்றாா்.

உத்தர பிரதேசத்தின் கோரக்பூரில் இருந்து கடந்த 9-ஆம் தேதி மோட்டாா் சைக்கிளில் தனது கைலாய யாத்திரையை தொடங்கிய சத்குரு ஜக்கி வாசுதேவ், நேபாளத்தின் காத்மாண்டு, பக்தபூா், துளிகேல் பகுதிகள் வழியாக திபெத்தின் ஜாங்மு, நாயலம், சாகா சென்று மானசரோவா் ஏரியை அடைந்து, அங்கிருந்து பாத யாத்திரையாக சென்று கைலாய மலையில் தரிசனம் செய்தாா்.

இந்த யாத்திரையின் இடையில் நடிகா் மாதவன், கிரிக்கெட் வீரா் வருண் சக்கரவா்த்தி, பிரபல இயக்குநா் நாக் அஸ்வின் உள்ளிட்ட பிரபலங்களுடன் அவா் ஆன்லைனில் கலந்துரையாடினாா்.