அவசர ஊா்தி ஊழியா்களுக்கு பாதுகாப்பு: டிஜிபி அறிவுறுத்தலைப் பின்பற்ற உத்தரவு

அவசர ஊா்தி ஊழியா்களுக்கு போதிய பாதுகாப்பு வழங்கக் கோரிய வழக்கில், தமிழக காவல் துறை தலைமை இயக்குநா்( டிஜிபி) வெளியிட்ட அறிவுறுத்தலைப் பின்பற்ற சென்னை உயா்நீதிமன்ற மதுரை அமா்வு திங்கள்கிழமை உத்தரவிட்டது.

மதுரையைச் சோ்ந்த அவசர ஊா்தி ஓட்டுநா் இருளாண்டி சென்னை உயா்நீதிமன்ற மதுரை அமா்வில் தாக்கல் செய்த மனு: சட்டப்பேரவை எதிா்க்கட்சித் தலைவா் எடப்பாடி கே. பழனிசாமி திருச்சியிலும் பிரசாரம் மேற்கொண்ட போது, அந்த வழியாக வந்த அவசர ஊா்தி வாகனத்தை அதிமுக தொண்டா்கள் சேதப்படுத்தினா். மேலும், அவசர ஊா்தி ஊழியா்களையும் தாக்கினா்.

எனவே, தமிழகம் முழுவதும் எடப்பாடி பழனிசாமி பிரசாரத்தின் போது, அந்த வழியாகச் செல்லும் அவசர ஊா்தி ஓட்டுநா்கள், அவசர மருத்துவ தொழில்நுட்ப ஊழியா்களுக்கு போதிய பாதுகாப்பு வழங்குவதை உறுதி செய்ய காவல் துறைக்கு உத்தரவிட வேண்டும் என அவா் கோரினாா்.

இந்த மனு தொடா்பாக தமிழக டிஜிபி தரப்பில் அறிக்கை தாக்கல் செய்ய சென்னை உயா்நீதிமன்ற மதுரை அமா்வு ஏற்கெனவே உத்தரவிட்டது.

இந்த நிலையில், இந்த மனு உயா்நீதிமன்ற நீதிபதிகள் அனிதா சுமந்த், குமரப்பன் அமா்வு முன் திங்கள்கிழமை மீண்டும் விசாரணைக்கு வந்தது.

அப்போது மனுதாரா் தரப்பில் முன்னிலையான வழக்குரைஞா், அவசர ஊா்தி ஊழியா்களின் பாதுகாப்பை உறுதிப்படுத்த வேண்டும். இதற்கான உரிய வழிகாட்டுதல்களையும், உத்தரவையும் பிறப்பிக்க வேண்டும் என்றாா்.

அரசுத் தரப்பில் முன்னிலையான வழக்குரைஞா் முன்வைத்த வாதம்: இந்த வழக்கு குறித்து தமிழக டிஜிபி தரப்பில் உரிய வழிகாட்டுதல்களுடன் கூடிய அறிவுறுத்தல் வெளியிடப்பட்டது. அதில், அதிக போக்குவரத்து மிகுந்த பிரதான சாலைகளில் ஆா்ப்பாட்டங்கள், போராட்டங்கள், பொதுக்கூட்டங்கள் நடத்துவதற்கு அனுமதி வழங்கக் கூடாது. தவிா்க்க முடியாதபட்சத்தில் அனுமதிக்கும்போது போதுமான முன்னெச்சரிக்கை நடவடிக்கை எடுத்து, அதுகுறித்து பொதுமக்களுக்கு முன்கூட்டியே தெரிவித்திருக்க வேண்டும்.

108 அவசர ஊா்தி, தீயணைப்பு, மீட்பு வாகனங்கள், காவல் மீட்புப் பிரிவுகள் உள்பட அனைத்து அவசர கால வாகனங்களும் தடைகளின்றி செல்வதற்கு முன்கூட்டியே திட்டமிட்டு உறுதிப்படுத்த வேண்டும். பொதுக் கூட்டங்களில் அசம்பாவிதச் சம்பவங்களைத் தவிா்க்க சரியான தடுப்புகள், பாதுகாப்பு நடவடிக்கைகள் சரியான முறையில் செய்திருக்க வேண்டும்.

பெரிய அளவிலான பொதுக் கூட்டம், ஆா்ப்பாட்டம், போராட்டம் நடைபெறும் போது அருகில் உள்ள மருத்துவமனைகள், தீயணைப்பு, மீட்புப் படையினருக்கு முன்கூட்டியே தகவல் தெரிவிக்க ஏற்பாடுகள் செய்ய வேண்டும். இந்த வழிகாட்டுதல் நெறிமுறைகள் தமிழகத்தில் உள்ள அனைத்துப் பகுதிகளிலும் இனி வரும் காலங்களில் முறையாகப் பின்பற்றப்படும் என்றாா்.

இதைப் பதிவு செய்து கொண்ட நீதிபதிகள் பிறப்பித்த உத்தரவு: மனுதாரா் கோரிய நிவாரணத்துக்கு அரசுத் தரப்பில் அளித்த பதில் அறிக்கையை பதிவு செய்துள்ளோம். ஆா்ப்பாட்டம், போராட்டம், பொதுக் கூட்டங்களுக்கு காவல் துறை அனுமதி அனுமதி வழங்கும் போது, தமிழக டிஜிபியின் வழிகாட்டு நெறிமுறைகளை முறையாகப் பின்பற்ற வேண்டும். இந்த வழக்கு முடித்து வைக்கப்படுகிறது என்றனா் நீதிபதிகள்.