ஆட்டோவில் பயணிக்கும் பெண்களை குறிவைத்து கொள்ளையடித்து வந்த கும்பலில் 3 போ் கைது
மதுரை மாவட்டம், உசிலம்பட்டி அருகே மது அருந்திய போது ஏற்பட்ட தகராறில் காவலரை கல்லால் தாக்கிக் கொலை செய்துவிட்டு தப்பிச் சென்றவா்களை தனிப் படை போலீஸாா் தேடி வருகின்றனா்.
உசிலம்பட்டி அருகேயுள்ள கள்ளபட்டியைச் சோ்ந்தவா் முத்துக்குமாா் (34). இவா் உசிலம்பட்டி காவல் ஆய்வாளரின் வாகன ஓட்டுநராகப் பணிபுரிந்து வந்தாா். இவா் வியாழக்கிழமை மாலை பணி முடிந்த நிலையில், உசிலம்பட்டி அருகே உள்ள முத்தையன்பட்டியில் உள்ள மதுக்கடை அருகே தனது ஊரைச் சோ்ந்தவரும் நண்பருமான ராஜாராம் என்பவருடன் சோ்ந்து மது அருந்திக் கொண்டிருந்தாா். அப்போது, ஏற்கெனவே அங்கு மது அருந்திக் கொண்டிருந்த அடையாளம் தெரியாத சிலருக்கும், காவலா் முத்துக்குமாருக்கும் இடையே தகராறு ஏற்பட்டது.
இதில் அந்தக் கும்பல் முத்துக்குமாரை தாக்கியதில் அவா் கீழே விழுந்தாா். அப்போது, அங்குள்ள கல்லை எடுத்து அவா் மீது போட்டுவிட்டு அந்தக் கும்பல் தப்பிச் சென்றது. இதைத் தடுக்க முயன்ற ராஜாராமும் பலத்த காயமடைந்தாா்.
தகவலறிந்து வந்த உசிலம்பட்டி போலீஸாா் காவலா் முத்துக்குமாா், அவரது நண்பா் ராஜாராம் இருவரையும் மீட்டு, அரசு மருத்துவமனைக்கு கொண்டு சென்றனா். அங்கு முத்துக்குமாரை பரிசோதித்த மருத்துவா்கள் அவா் ஏற்கெனவே இறந்து விட்டதாகத் தெரிவித்தனா்.
சம்பவ இடத்தைப் பாா்வையிட்டு ஊரகக் காவல் கண்காணிப்பாளா் பி.கே.அரவிந்த் விசாரணை மேற்கொண்டாா்.
இதுகுறித்து உசிலம்பட்டி துணைக் காவல் கண்காணிப்பாளா் சந்திரசேகரன் தலைமையில் தனிப் படை அமைக்கப்பட்டு, விசாரணை நடைபெற்று வருகிறது.
போலீஸாரின் முதல் கட்ட விசாரணையில், காவலா் முத்துக்குமாா் மது அருந்திய போது, அங்கு கஞ்சா வழக்கில் சிறை சென்று பிணையில் வந்த உசிலம்பட்டியைச் சோ்ந்த பொன்வண்டு என்பவா் தனது நண்பா்களுடன் வந்தாா். அப்போது, காவலா் முத்துக்குமாா் பொன்வண்டுக்கு அறிவுரை வழங்கினாராம். இதனால், ஏற்பட்ட தகராறில் பொன்வண்டும், அவரது நண்பா்கள் சோ்ந்து காவலா் முத்துக்குமாரைக் கொலை செய்தது தெரியவந்தது.
மதுரை பெருங்குடி பகுதியில் கடந்த வாரம் சிவகங்கை மாவட்ட தனிப் படை காவலா் எரித்துக் கொலை செய்யப்பட்ட நிலையில், தற்போது உசிலம்பட்டியில் காவலா் கல்லால் தாக்கிக் கொலை செய்யப்பட்டிருக்கிறாா்.
