கடலில் 6 ஆயிரம் மீன் குஞ்சுகள் இருப்பு செய்யும் திட்டம்: ஆட்சியா் தொடங்கிவைத்தாா்

மீன் வளம் மற்றும் மீனவா் நலத் துறை சாா்பில், கடலூா் மாவட்டம், புதுக்குப்பம் மீனவ கிராமம் அருகேயுள்ள கடற்பகுதியில் சுமாா் 2.5 நாட்டிக்கல் மைல் தொலைவில் மீன் குஞ்சுகள் இருப்பு செய்யும் திட்டத்தை ஆட்சியா் சிபி ஆதித்யா செந்தில்குமாா் வியாழக்கிழமை தொடங்கிவைத்தாா்.

நிகழ்ச்சியில் ஆட்சியா் தெரிவித்ததாவது: தமிழகத்தில் கடற்பகுதியில் குறைந்து வரும் மீன் வளத்தை மேம்படுத்தும் வகையில், பிரதம மந்திரி மீன் வள மேம்பாட்டு திட்டத்தின் கீழ், தேசிய மீன் வள மேம்பாட்டு வாரிய நிதியுதவியுடன் கடலில் மீன் குஞ்சுகள் இருப்பு செய்தல் திட்டம் செயல்படுத்தப்படுகிறது.

கடல் பகுதிகளில் மீன் வளம் மற்றும் மீனவா் நலத் துறை மூலம் செயல்படுத்தப்பட்ட பல்வேறு திட்டங்கள் வாயிலாக கடலில் செயற்கையாக அமைக்கப்பட்ட பவளப்பறைகளில் மீன் குஞ்சுகள் இருப்பு செய்திட இந்தத் திட்டத்தின் கீழ் வழிகாட்டு நெறிமுறைகள் வழங்கப்பட்டுள்ளன.

கடலூா் மாவட்டத்தில் புதுக்குப்பம், பெரியக்குப்பம், அய்யம்பேட்டை ஆகிய கிராமங்களின் கடல் பகுதிகள் இத்திட்டத்துக்கு தோ்வு செய்யப்பட்டுள்ளன. இந்த கடல் பகுதிகளில் மீன் குஞ்சுகள் இருப்பு செய்திட தேவையான மீன் குஞ்சுகளை தமிழ்நாடு மாநில திட்டக்குழு புதுமை முயற்சி திட்ட நிதியுதவியுடன் பரங்கிப்பேட்டை மீன் வளம் மற்றும் மீனவா் நலத் துறை உதவி இயக்குநா் அலுவலக கட்டுப்பாட்டிலுள்ள மாதிரி மீன் பண்ணையில் ‘கொடுவா மீன்குஞ்சுகள் வளா்த்தல்’ திட்டத்திலிருந்து, முதற்கட்டமாக 8 - 10 செ.மீ அளவுடைய 6,000 கொடுவா மீன் குஞ்சுகள் கொள்முதல் செய்யப்பட்டு, புதுக்குப்பம் மீனவ கிராம கடல் பகுதியில் இருப்பு செய்யப்பட்டுள்ளது.

மேலும், சிதம்பரம் வட்டத்துக்குள்பட்ட பொன்னந்திட்டு பகுதியில் இறால் வளா்ப்பு பணியில் ஈடுபட்டுள்ள விவசாயி குளத்தில் இறால் குஞ்சுகள் இருப்பு செய்யப்பட்டது. இத்திட்டத்தில் உவா்நீா் இறால் வளா்ப்பில் 2 ஹெக்டோ் அளவிலான புதிய இறால் வளா்ப்பு குளம் அமைப்பதற்கு அனுமதி வழங்கப்பட்டு, மானியமாக ரூ.6.40 லட்சம் மற்றும் உள்ளீட்டு மானியமாக ரூ.4.80 லட்சம் வழங்கப்பட உள்ளது.

இந்தத் திட்டத்தால், கடலில் மீன் வளம் குறையாமல் பாதுகாக்கப்படுவதுடன், மீன் பெருக்கம் அதிகரிக்கப்படும். மீன் பிடி தொழிலை சாா்ந்திருப்பவா்களுக்கு வருமானமும் அதிகரிக்க வழிவகை ஏற்படும் என்றாா்.

நிகழ்ச்சியில் சிதம்பரம் சாா் - ஆட்சியா் கிஷன்குமாா், கடலூா் மண்டல மீன் வளம் மற்றும் மீனவா் நலத் துறை துணை இயக்குநா் வேல்முருகன், உதவி இயக்குநா்கள் ரம்யா, யோகேஷ் மற்றும் மாவட்ட மீன் வளா்போா் மேம்பாட்டு முகமை உறுப்பினா்கள் உள்பட பலா் கலந்துகொண்டனா்.