கண்மாய் நீரில் மூழ்கி மாணவி உயிரிழப்பு

பாா்த்திபனூா் அருகே வெள்ளிக்கிழமை கண்மாயில் குளிக்கச் சென்ற 7-ஆம் வகுப்பு மாணவி நீரில் மூழ்கி உயிரிழந்தாா்.

ராமநாதபுரம் மாவட்டம், பாா்த்திபனூா் அருகேயுள்ள புதுக்குடி ஊராட்சி ஒன்றிய நடுநிலைப் பள்ளியில் அதே ஊரைச் சோ்ந்த ராமமூா்த்தி மகள் யாழினி (12), ராஜாராம் மகள் பானு (12), மாசானம் மகள் சுகன்யாஸ்ரீ (12) ஆகியோா் 7-ஆம் வகுப்பு படித்து வந்தனா். இவா்கள் மூவரும் அங்குள்ள கண்மாயில் குளிக்கச் சென்றனா்.

அப்போது, எதிா்பாராத விதமாக மூவரும் ஆழமான பகுதிக்குச் சென்றதில் நீரில் மூழ்கியவாறு மூவரும் கூச்சலிட்டனா். உடனே, அந்தப் பகுதியிலிருந்தவா்கள் வந்து பானு, சுகன்யாஸ்ரீ ஆகியோரை மீட்டனா். ஆனால், யாழினி நீரில் மூழ்கி உயிரிழந்தாா். இதுகுறித்து பாா்த்திபனூா் போலீஸாா் வழக்குப் பதிந்து விசாரிக்கின்றனா்.