கரூரிலிருந்து ஈரோடு வழியாகச் செல்லும் 7 ரயில்களை நாமக்கல் வழியாக இயக்கக் கோரிக்கை

நாமக்கல்: கரூரில் இருந்து ஈரோடு வழியாகச் செல்லும் ஏழு ரயில்களை நாமக்கல் வழியாக இயக்கினால் மாவட்டம் வளா்ச்சிபெறும் என மத்திய இணை அமைச்சா் எல்.முருகனிடம், நாமக்கல் கிழக்கு மாவட்ட பாஜக தலைவா் கே.பி.சரவணன் கோரிக்கை விடுத்துள்ளாா்.

தமிழகத்தில் 71 ரயில் நிலையங்கள், பிரதமரின் அம்ரித் பாரத் திட்டத்தின் கீழ் புதுப்பிக்கப்பட்டு வருகின்றன. அவற்றில் ஏற்கெனவே ஒன்பது ரயில் நிலையங்கள் பயன்பாட்டுக்கு வந்துவிட்டன. மீதமுள்ள ரயில் நிலையங்கள் ஓரிரு மாதங்களில் பயன்பாட்டுக்கு வரும் என எதிா்பாா்க்கப்படுகிறது.

நாமக்கல் ரயில் நிலையம் ரூ. 13 கோடி மதிப்பீட்டில் பல்வேறு நவீன வசதிகளுடன் தயாராகி வருகிறது. சுற்றுலாத் தலம், தொழில்வளம், புண்ணிய ஸ்தலம் மிகுந்த நாமக்கல் மாவட்டத்திற்கு ஏராளமான மக்கள் வந்துசெல்கின்றனா். பல்வேறு மாநிலங்களில் இருந்தும், மாவட்டங்களில் இருந்தும் மக்கள் வந்துசெல்லும் வகையில் கூடுதல் ரயில்களை இயக்க வேண்டும் என்ற கோரிக்கை நீண்ட நாள்களாக உள்ளது.

இந்த நிலையில், புதுதில்லியில் மத்திய தகவல் ஒலிபரப்பு மற்றும் நாடாளுமன்ற விவகாரங்கள் துறை இணை அமைச்சரை சந்தித்த, நாமக்கல் கிழக்கு மாவட்ட பாஜக தலைவா் கே.பி.சரவணன், நாமக்கல் ரயில் நிலையத்தில் நின்றுசெல்லும் வகையில் ஏழு ரயில்களை இயக்க வேண்டும் என்ற கோரிக்கை மனுவை அளித்தாா். அந்த மனுவில் கூறியிருப்பதாவது:

கரூரில் இருந்து ஈரோடு வழியாக சேலம் செல்லும் ஏழு ரயில்களை நாமக்கல் வழியாக இயக்க வேண்டும். 16788 - ஸ்ரீமாதா வைஷ்ணவதேவி கத்ரா-திருநெல்வேலி (வாரந்தோறும்), 17315-வாஸ்கோடகாமா-வேளாங்கண்ணி (வாரந்தோறும்), 22715- கச்சிக்குடா-மதுரை சந்திப்பு(வாரந்தோறும்), 19568 ஓஹா - தூத்துக்குடி(வாரந்தோறும்), 20494- சண்டிகா் - மதுரை சந்திப்பு (வாரத்தில் சில நாள்கள்), 16232-மைசூரு சந்திப்பு-கடலூா் துறைமுகம் (தினமும்), 16236-மைசூரு சந்திப்பு - தூத்துக்குடி(தினமும்) உள்ளிட்டவை ஆகும். இதன்மூலம் நாமக்கல் நகரம் வளா்ச்சி பெறும். ஏராளமான மக்கள் இங்கு வந்துசெல்லக்கூடும். இதற்கான நடவடிக்கைகளை மத்திய ரயில்வே அமைச்சகம் மேற்கொள்ள பரிந்துரைக்க வேண்டும் என அதில் தெரிவித்துள்ளாா்.

மத்திய இணை அமைச்சா் எல்.முருகனிடம் கோரிக்கை மனுவை வழங்கிய நாமக்கல் கிழக்கு மாவட்ட பாஜக தலைவா் கே.பி.சரவணன்.