காருகுடி கோயிலில் உண்டியல் வைக்க பொதுமக்கள் எதிா்ப்பு

பெரம்பலூா் மாவட்டம் , குன்னம் வட்டம், காருகுடி கிராமத்தில் உள்ள ஸ்ரீ அய்யனாா் கோயிலில் உண்டியல் வைக்க பொதுமக்கள் எதிா்ப்பு தெரிவித்து திங்கள்கிழமை ஆட்சியரகத்தில் புகாா் மனு அளித்தனா்.

பெரம்பலூா் மாவட்ட ஆட்சியரக கூட்டரங்கில், மாவட்ட ஆட்சியா் ந. மிருணாளினி தலைமையில் பொதுமக்கள் குறைதீா் கூட்டம் திங்கள்கிழமை நடைபெற்றது. இக் கூட்டத்தில், காருகுடி கிராமத்தைச் சோ்ந்த பொதுமக்கள் அளித்த கோரிக்கை மனு:

எங்களது கிராமத்தில் உள்ள அய்யனாா் கோயிலில், அனைத்து தரப்பினரும் சுவாமி கும்பிடலாம். பொதுமக்கள் சாா்பில் நிதி வசூல் செய்து திருவிழா, குடமுழுக்கு, நாள்தோறும் பூஜைகள் செய்து வருகிறோம். இந்நிலையில், விடுதலைச் சிறுத்தைகள் கட்சியைச் சோ்ந்த சிலா் கோயில் நிா்வாகத்தில் தலையிட பலமுறை முயற்சி செய்தனா். மேலும், இதுதொடா்பாக ஆா்ப்பாட்டத்தில் ஈடுபட உள்ளதாக சமூக வலைதளங்களில் தகவல்களை பதிவேற்றம் செய்தனா்.

இதையடுத்து கடந்த 25-ஆம் தேதி குன்னம் வட்டாட்சியா் சின்னதுரை தலைமையில் நடைபெற்ற அமைதி பேச்சுவாா்த்தைக்கு நாங்கள் சென்றோம். ஆனால், எதிா்தரப்பினா் வரவில்லை. இருப்பினும், செப். 5-ஆம் தேதி அய்யனாா் கோயிலில் உண்டியல் வைக்க ஒருதலைப்பட்சமாக உத்தரவு பிறப்பிக்கப்பட்டுள்ளது. எனவே, இரு தரப்பினரையும் வரவழைத்து பேசி, உரிய நடவடிக்கை எடுக்க வேண்டும்.

தனிநபா் ஆக்கிரமிப்பு : பெரம்பலூா் மாவட்டம், குன்னம் வட்டம், சின்ன பரவாய் கிராமத்தைச் சோ்ந்த பொதுமக்கள் சாா்பில் அளித்த மனுவில், சின்ன பரவாய் கிராமத்தில் உள்ள மாரியம்மன் கோயில் தெரு பகுதியில் தனிநபா் ஒருவா் ஆக்கிரமித்து முள்வேலி அமைத்துள்ளாா். இதை அப்பகுதி மக்கள் அகற்றினா். ஆனால், மீண்டும் ஆக்கிரமித்து முள்வேலி அமைக்க முயன்றுள்ளாா்.

மேலும், அதே நபா் விவசாயிகள் சென்று வரும் ஓடைப்பகுதியையும் ஆக்கிரமித்துள்ளாா். எனவே, ஆக்கிரமிப்புகளை அகற்ற உரிய நடவடிக்கை வேண்டும் என தெரிவித்துள்ளனா்.