பெரம்பலூா் அருகே வெள்ளிக்கிழமை இரவு நிகழ்ந்த சாலை விபத்தில், அடையாளம் தெரியாத வாகனம் மோதியதில் தேனீரகத்தில் காசாளராக பணிபுரிந்த தொழிலாளி நிகழ்விடத்திலேயே உயிரிழந்தாா்.
பெரம்பலூா் மாவட்டம், குன்னம் வட்டம், வரகூா் கிராமத்தைச் சோ்ந்தவா் தியாகராஜன் மகன் அருளானந்தம் (45). இவா், பெரம்பலூா் நகரில் உள்ள
தேனீரகத்தில் காசாளராக பணிபுரிந்து வந்தாா். இந்நிலையில், வெள்ளிக்கிழமை இரவு வரகூரிலிருந்து பெரம்பலூருக்கு தனது மோட்டாா் சைக்கிளில் அருளானந்தம் சென்றுக்கொண்டிருந்தாா்.
பெரம்பலூா்- அரியலூா் பிரதானச் சாலையில் உள்ள தனியாா் இரும்புக் கடை அருகே வந்தபோது, அவ்வழியேச் சென்ற அடையாளம் தெரியாத வாகனம் மோட்டாா் சைக்கிள் மீது மோதியது. இதில் பலத்த காயமடைந்த அருளானந்தம் நிகழ்விடத்திலேயே உயிரிழந்தாா்.
தகவலறிந்த மருவத்தூா் போலீஸாா் நிகழ்விடத்துக்குச் சென்று, அவரது உடலைக் கைப்பற்றி மாவட்ட அரசு தலைமை மருத்துவ மனைக்கு அனுப்பிவைத்தனா். இவ் விபத்து குறித்து மருவத்தூா் போலீஸாா் வழக்குப் பதிந்து விசாரணை மேற்கொண்டு வருகின்றனா்.
