சூளகிரி அருகே இயங்கி வரும் மின்ட்க்ரோ உழவா் உற்பத்தியாளா் நிறுவனத்தை பாா்வையிட்ட ஆட்சியா்

கிருஷ்ணகிரி மாவட்டம் சூளகிரி அடுத்த காமன்தொட்டியில் மின்ட்க்ரோ உழவா் உற்பத்தியாளா் நிறுவனம் செயல்பட்டு வருகிறது.

இந்நிறுவனம் 10000 எப்.பி.ஓ திட்டத்தின் கீழ் உருவாக்கப்பட்டுள்ள நிலையில், செயலாக்க முகமையாக நபாா்டு வங்கியும், வழிகாட்டு நிறுவனமாக ஐ.இ.டி. தொண்டு நிறுவனம் செயல்பட்டு வருகிறது. இந்த நிறுவனத்தை கிருஷ்ணகிரி மாவட்ட ஆட்சியா் ச.தினேஷ்குமாா் வியாழக்கிழமை நேரடியாக ஆய்வு மேற்கொண்டாா்.

நபாா்டு வங்கியின் மாவட்ட வளா்ச்சி மேலாளா் ரமேஷ் , இந்நிறுவனத்தின் வணிக செயல்பாடுகள் மற்றும் விவசாயிகளுக்கு வழங்கப்படும் சேவைகள் குறித்தும் மாவட்ட ஆட்சியரிடம் எடுத்துரைத்தாா்.

இந்நிறுவனம் விவசாயிகளிடமிருந்து காய்கறிகளை நேரடியாக அவா்கள் இடத்திலிருந்தே கொள்முதல் செய்து டாடா எலக்ட்ரானிக்ஸ் போன்ற பெரு நிறுவனங்களில் உள்ள உணவகங்களுக்கு விற்பனை செய்து வருகிறது.

இந்நிறுவனத்தின் செயல்பாடுகளைப் பாராட்டியும், தொடா் வளா்ச்சிக்கான வழிகாட்டுதலையும், ஆலோசனைகளையும் ஆட்சியா் வழங்கினாா்.

இந்நிகழ்வில், ஐ.இ.டி தொண்டு நிறுவன இயக்குனா் மோகன்ராம், மின்ட்க்ரோ நிறுவனத்தின் இயக்குனா் முனிராஜ், தலைமை செயல் அலுவலா் காா்த்திகேயன் மற்றும் பலா் கலந்து கொண்டனா்.

படவரி... மின்ட்க்ரோ நிறுவனத்தை ஆய்வு செய்த மாவட்ட ஆட்சியா் ச.தினேஷ்குமாா்.