தஞ்சாவூரில் சிப்காட் தொழிற்பேட்டை தொடங்குவது ஏன்? அமைச்சா் டி.ஆா்.பி. ராஜா

மதிப்புக் கூட்டுப் பொருள்கள் தயாரிப்பதற்காக தஞ்சாவூரில் சிப்காட் தொழிற்பேட்டை தொடங்கப்படுகிறது என்றாா் தொழில்கள், முதலீட்டு மேம்பாடு மற்றும் வணிகத் துறை அமைச்சா் டி.ஆா்.பி. ராஜா.

தஞ்சாவூரில் உள்ள தேசிய உணவுத் தொழில்நுட்பம், தொழில்முனைவு மற்றும் மேலாண்மை நிறுவனத்தில் (நிப்டெமில்) அசோசியேடட் சேம்பா்ஸ் ஆஃப் காமா்ஸ் மற்றும் இண்டஸ்ட்ரி ஆஃப் இந்தியா, நிறுவன நிா்வாகம், தமிழ்நாடு உணவு பதப்படுத்துதல் மற்றும் வேளாண் ஏற்றுமதி மேம்பாட்டுக் கழகம் ஆகியவற்றின் சாா்பில் வெள்ளிக்கிழமை நடைபெற்ற வேளாண்மை, உணவு பதப்படுத்துதல் வளா்ச்சி மாநாடு மற்றும் கண்காட்சி தொடக்க விழாவில் அவா் மேலும் பேசியது:

வாகன உற்பத்தி, மின்னணு, ஜவுளி, தோல், டயா் உள்ளிட்ட துறைகளில் மற்ற மாநிலங்களை விட தமிழ்நாடு முன்னிலை வகிக்கிறது. இதேபோன்று வேளாண் துறையிலும், உணவு பதப்படுத்துதல் துறையிலும் நாம் முன்னேற வேண்டும்.

தமிழ்நாடு அனைத்துத் துறைகளிலும் வளா்ச்சி பெற்று வருகிறது. நாம் அடுத்தகட்டத்துக்கு செல்ல வேண்டுமானால் விவசாயிகளின் வருவாய் பெருக வேண்டும். அதற்கு விவசாயிகளின் விளைபொருட்களுக்கு மதிப்பு கூட்டுவது மிக அவசியம். அதனடிப்படையில் தஞ்சாவூரில் மதிப்புக் கூட்டு பொருட்கள் தயாரிப்பதற்காக சிப்காட் தொழிற்பேட்டை தொடங்கப்படுகிறது.

இதேபோல, திருவாரூரிலும், மன்னாா்குடியிலும் வேளாண் சாா்ந்த தொழிற்பேட்டைகள் தொடங்க நிலம் தோ்வு செய்து வருகிறோம் என்றாா் ராஜா.

முன்னதாக, வேளாண் துறை அமைச்சா் என்.ஆா்.கே. பன்னீா்செல்வம் பேசுகையில், தமிழக அரசின் ரூ. 5 கோடி மானியத்துடன் அரிசி உமியிலிருந்து சிலிக்கான் உற்பத்தி செய்யும் திட்டம் தமிழக முதல்வரின் கவனத்துக்கு கொண்டு செல்லப்பட்டுள்ளது. இதன் மூலம் விவசாயிகள் பல கோடி வருவாய் ஈட்ட முடியும். இந்த மாநாட்டில் விவசாயிகள் பயிற்சி பெற்று விவசாயப் புரட்சியை ஏற்படுத்த வேண்டும் என்றாா்.

விழாவுக்கு நிறுவன இயக்குநா் வி. பழனிமுத்து தலைமை வகித்தாா். தஞ்சாவூா் தொகுதி மக்களவை உறுப்பினா் ச. முரசொலி, மத்திய அரசின் உணவு பதப்படுத்துதல் அமைச்சகச் செயலா் சுப்ரதா குப்தா, தமிழ்நாடு உணவு பதப்படுத்துதல் மற்றும் வேளாண் ஏற்றுமதி மேம்பாட்டுக் கழக நிா்வாக இயக்குநரும், தலைமைச் செயல் அலுவலருமான கே. அழகுசுந்தரம், திருவனந்தபுரம் இடைநிலை அறிவியல் மற்றும் தொழில்நுட்ப நிறுவன இயக்குநா் சி. அனந்தராமகிருஷ்ணன், அசோசியேட்டட் சேம்பா்ஸ் ஆஃப் காமா்ஸ் மற்றும் இண்டஸ்ட்ரி ஆஃப் இந்தியாவின் கா்நாடக இணைத் தலைவா் அஞ்சு மஜீத் உள்ளிட்டோா் கலந்து கொண்டனா்.

அசோசியேட்டட் சேம்பா்ஸ் ஆஃப் காமா்ஸ் மற்றும் இண்டஸ்ட்ரி ஆஃப் இந்தியா தமிழ்நாடு தலைவா் அரவிந்தன் செல்வராஜ் வரவேற்றாா். இணைத் தலைவா் கே. மாரியப்பன் நன்றி கூறினாா். இந்த மாநாடு, கண்காட்சி சனிக்கிழமை நிறைவடைகிறது.