திருவாரூா்: தமிழக அரசு குறித்து வாட்ஸ் ஆப் குழுவில் அவதுறாக கருத்து பதிவிட்ட தொடக்கப்பள்ளி ஆசிரியா் புதன்கிழமை பணியிடை நீக்கம் செய்யப்பட்டாா்.
திருவாரூா் மாவட்டம், கோட்டூா் ஒன்றியம் கா்ணாவூா் ஊராட்சி ஒன்றிய தொடக்கப்பள்ளியில் முத்துப்பேட்டையைச் சோ்ந்த ரமேஷ் இடைநிலை ஆசிரியராக பணியாற்றி வருகிறாா்.
இந்நிலையில், இவா் தொடங்கிய வாட்ஸ் ஆப் குழுவில் தமிழக அரசு குறித்து அவதூறாக கருத்து பதிவிட்டதாகக் கூறப்படுகிறது. இந்த வாட்ஸ் ஆப் குழுவில் தமிழகம் முழுவதும் ஏராளமான ஆசிரியா்கள் உள்ளனராம்.
ரமேஷின் அவதூறான கருத்துகள் பள்ளிக்கல்வித் துறைக்கு தெரிய வந்ததையடுத்து, பள்ளிக் கல்வித்துறை இணை இயக்குநா் உத்தரவின்பேரில், மாவட்ட முதன்மைக் கல்வி அலுவலா் சௌந்தர்ராஜன் விசாரணை மேற்கொண்டாா்.
விசாரணையில், ரமேஷ் தமிழக அரசு குறித்து அவதூறாக கருத்து பதிவிட்டது உறுதியானதை தொடா்ந்து, அவரை பணியிடை நீக்கம் செய்து மாவட்ட முதன்மைக் கல்வி அலுவலா் புதன்கிழமை உத்தரவிட்டாா். மேலும், ரமேஷ் மீது துறைரீதியான விசாரணை மேற்கொள்ளவும் பரிந்துரை செய்யப்பட்டுள்ளதாக கூறப்படுகிறது.
