திமுக கூட்டணியில் சலசலப்பை ஏற்படுத்த முயற்சி: தொல்.திருமாவளவன்

திமுக கூட்டணிக்குள் சலசலப்பை ஏற்படுத்த முயற்சிக்கிறாா்கள் என்று விடுதலைச் சிறுத்தைகள் கட்சித் தலைவா் தொல்.திருமாவளவன் எம்.பி. தெரிவித்தாா்.

சிதம்பரம் அருகே உள்ள பின்னத்தூரில் நடைபெற்ற நிகழ்ச்சியில் பங்கேற்ற அவா், பின்னா் செய்தியாளா்களிடம் கூறியதாவது:

பொது இடங்களில் உள்ள அரசியல் கட்சிகளின் கொடிக்கம்பங்களை அகற்ற வேண்டும் என்ற நீதிமன்ற உத்தரவை எதிா்த்து மேல்முறையீடு செய்துள்ளோம். இந்த நிலையில், விசிக கொடிக்கம்பங்களை அகற்றுவதில் சில அதிகாரிகள் குறியாக இருக்கிறாா்கள். சிதம்பரத்தில் கொடிக்கம்பத்தை அதிகாரி ஒருவா் அகற்றிய போது, அம்பேத்கா் சிலை சேதப்படுத்தப்பட்டுள்ளது. இந்த நடவடிக்கைக்கு கண்டனம் தெரிவிக்கிறேன்.

தேசிய கல்விக் கொள்கையை தமிழகத்தில் நடைமுறைப்படுத்தினால்தான் சமக்ர சிக்ஷா திட்ட கல்வி நிதியை தருவோம் என மத்திய அரசு நிறுத்திவைத்துள்ளது. இதுதொடா்பாக எந்த நீதிபதியும் கருத்து கூறவில்லை.

ஒவ்வொரு தோ்தலின் போதும், கூடுதல் தொகுதிகளை ஒதுக்க வேண்டும் எனக் கேட்கிறோம். கூட்டணியில் உள்ளஅனைத்துக் கட்சிகளையும் அரவணைக்க வேண்டும். கூட்டணிக்கு தலைமை வகிக்கும் திமுக தலைவா் மு.க.ஸ்டாலின் எங்களுடன் அதுகுறித்து பேசும் போதும், சூழலைக் கருத்தில் கொண்டு, கூட்டணியின் நலன், வெற்றியை முன்னிறுத்தி முடிவெடுப்போம். அது பேச்சுவாா்த்தையின் போது இறுதி செய்யப்படும். நாங்கள் திமுக கூட்டணியில்தான் இருப்போம். முடிந்தவரை கூடுதல் இடங்களைப் பெற முயற்சிப்போம். திமுக கூட்டணிக்குள் சலசலப்பை ஏற்படுத்த முயற்சிக்கிறாா்கள். அதற்கெல்லாம் வாய்ப்பே இல்லை. திமுக கூட்டணியில் இருந்து எந்தக் கட்சியும் வெளியேற வாய்ப்பே இல்லை.

சிதம்பரம் நகரில் வீடுகள் இடிக்கப்பட்டது தொடா்பாக, கடலூா் மாவட்ட ஆட்சியரிடம் பேசி இருக்கிறோம். பாமகவில் நிலவும் பிரச்னை குறித்து கருத்து தெரிவிக்க ஒன்றுமில்லை. அது உள்கட்சி விவகாரம்.

முருக பக்தா்களை பாஜக ஆதரவாளா்களாக மாற்ற ஆா்எஸ்எஸ், பாஜக முயற்சிக்கிறது. இதற்காக மதுரையில் முருக பக்தா்கள் மாநாட்டை நடத்துவதாக அறிவித்துள்ளனா். அவா்களின் முயற்சி பலிக்காது.

தமிழ்நாட்டில் மதத்தின் பெயரால் வன்முறையை தூண்ட முடியாது. ஆதாயம் தேடவும் முடியாது என்றாா் தொல்.திருமாவளவன்.

பேட்டியின் போது, விசிக கடலூா் மாவட்டச் செயலா் அரங்க.தமிழ்ஒளி மற்றும் நிா்வாகிகள் உடனிருந்தனா்.