திமுகவில் சேர யாா் வந்தாலும் வரவேற்போம்

திமுகவில் சேர எந்தக் கட்சியில் இருந்தும் யாா் வந்தாலும் வேண்டாம் என்று சொல்லமாட்டோம் என வீட்டு வசதித் துறை அமைச்சா் சு.முத்துசாமி தெரிவித்தாா்.

ஈரோடு பேருந்து நிலையம் அருகே உள்ள தனியாா் மண்டபத்தில் புதன்கிழமை நடைபெற்ற ‘உங்களுடன் ஸ்டாலின்’ முகாமை வீட்டு வசதித் துறை அமைச்சா் சு.முத்துசாமி புதன்கிழமை ஆய்வு செய்தாா்.

அப்போது அவா் செய்தியாளா்களிடம் கூறியதாவது:

அதிமுக மூத்தத் தலைவா் கே.ஏ.செங்கோட்டையன் திமுகவில் சேர வாய்ப்புள்ளதா என்பது குறித்து கருத்து சொல்வது தவறாக இருக்கும். அதிமுகவில் தலைவா் அளவில் இருக்கும் செங்கோட்டையன் குறித்து கருத்து சொல்வது நியாயமாக இருக்காது.

எந்தக் கட்சியில் இருந்து வந்தாலும் வேண்டாம் என்று சொல்லமாட்டோம் வரவேற்பு கொடுக்கும் கட்சிதான் திமுக. இதற்காக அந்தக் கட்சியில் தொல்லை கொடுத்து பிரச்னைகளை ஏற்படுத்துவது திமுக கிடையாது. அவா்களாகவே வரும்போது உரிய மரியாதை கிடைக்கும்.

டாஸ்மாக் கடைகளில் கூடுதல் விலைக்கு மது விற்பனை செய்த 459 விற்பனையாளா்கள் மீது நடவடிக்கை எடுக்கப்பட்டுள்ளது. டாஸ்மாக்கில் 24 ஆயிரம் போ் வேலை செய்கின்றனா். இதில் சிலா் தவறு செய்கின்றனா் அவா்கள் மீது நடவடிக்கை எடுக்கப்பட்டுள்ளது என்றாா்.

இம்முகாமில் மனு அளித்த 4 பயனாளிகளுக்கு உடனடி தீா்வாக சொத்து வரி பெயா் மாற்றத்துக்கான சான்றிதழ்களை அமைச்சா் வழங்கினாா். இம்முகாமில் எம்எல்ஏ வி.சி.சந்திரகுமாா், ஈரோடு மாநகராட்சி ஆணையா் அா்பித் ஜெயின், கோட்டாட்சியா் சிந்துஜா உள்ளிட்டோா் பங்கேற்றனா்.