திருப்பூா் புதிய பேருந்து நிலையம் அருகே ஆதரவற்ற நிலையில் மீட்கப்பட்ட 3 வயது சிறுவன் குழந்தைகள் நலக் குழுவிடம் ஒப்படைக்கப்பட்டாா்.
இதுகுறித்து மாவட்ட ஆட்சியா் தா.கிறிஸ்துராஜ் வெளியிட்டுள்ள செய்திக் குறிப்பு:
திருப்பூா் புதிய பேருந்து நிலையம் பகுதியில் 3 வயது சிறுவன் ஆதரவற்ற நிலையில் இருப்பதாக திருப்பூா் குழந்தைகள் உதவி மையத்துக்கு செவ்வாய்க்கிழமை தகவல் வந்துள்ளது. இந்தத் தகவலின்பேரில் அங்கு சென்ற குழந்தைகள் உதவிப் பணியாளா்கள் அந்த சிறுவனை மீட்டு மாவட்ட குழந்தைகள் நலக்குழுவிடம் ஒப்படைத்தனா்.
பின்னா் குழந்தைகள் நலக்குழு அறிவுரையின்படி, ஈரோடு மாவட்டத்தில் உள்ள ஹெல்ப்பிங் ஹாா்ட்ஸ் சிறப்பு தத்தெடுப்பு மையத்தில் பராமரிப்புக்காக புதன்கிழமை சிறுவன் ஒப்படைக்கப்பட்டாா். இந்த சிறுவன் குறித்த தகவல் தெரிந்தால் 30 நாள்களுக்குள் திருப்பூா் மாவட்ட ஆட்சியா் அலுவலகத்தில் 7-ஆவது தளத்தில் செயல்பட்டுவரும் மாவட்ட குழந்தைகள் பாதுகாப்பு அலுவலா் அலுவலகத்தையோ அல்லது திருப்பூா் வடக்கு காவல் நிலைய ஆய்வாளரையோ தொடா்பு கொள்ளலாம். அதே வேளையில் 30 நாள்களுக்குள் தகவல் தெரிவிக்கப்படாவிட்டால் குழந்தை சட்டப்படி தத்துக் கொடுக்கப்படும் என்று தெரிவிக்கப்பட்டுள்ளது.
