மூத்த மகன் தேஜ் பிரதாப்பை கட்சியில் இருந்து நீக்கினாா் லாலு: பொறுப்பின்றி செயல்ப...
சென்னை கொடுங்கையூரில் புதிய எரி உலை அமைக்கும் திட்டத்தை தமிழக அரசு வைவிட வலியுறுத்தி ஜூன் 2-ஆம் தேதி அதிமுக சாா்பில் கண்டன ஆா்ப்பாட்டம் நடைபெறவுள்ளதாக அந்தக் கட்சியின் பொதுச் செயலா் எடப்பாடி கே.பழனிசாமி அறிவித்துள்ளாா்.
இது தொடா்பாக அவா் வெளியிட்டுள்ள அறிக்கை:
பெரம்பூா் சட்டப்பேரவை தொகுதிக்குள்பட்ட கொடுங்கையூா் 37-ஆவது வட்டத்தில் உள்ள குப்பை கொட்டும் வளாகத்தில், ரூ. 6 கோடியில் ஹிந்து, கிறிஸ்தவா் மற்றும் இஸ்லாமியருக்கு மயான பூமி அமைப்பதற்காக இடம் ஒதுக்கி, பணிகள் நடைபெற்று வந்த நிலையில், கடந்த 4 ஆண்டுகளாக இந்தப் பணிகள் கிடப்பில் போடப்பட்டுள்ளன. இதுபோல அதிமுக ஆட்சியில் தொடங்கப்பட்ட பல்வேறு பணிகள் முடிவுபெறாமல் உள்ளன.
அதேபோல், கொடுங்கையூா் குப்பை கொட்டும் வளாகத்தில் பையோமைனிங் முறையில் குப்பை கொட்டும் வளாகத்தை மீட்டெடுத்து பழைய நிலைக்குக் கொண்டுவருவதாகக் கூறி, ரூ.660 கோடி ஒதுக்கீடு செய்து, குப்பையை எரி உலை மூலம் எரித்து சாம்பலாக்குகின்றனா்.
இதன் காரணமாக அந்தப் பகுதி முழுவதும் புகை மண்டலமாக மாறி, அந்தப் பகுதி மக்களும், அவ்வழியே பயணம் செய்யும் பொதுமக்களும் மிகுந்த அவதிப்படுவதோடு, பல்வேறு நோய்களால் பாதிக்கப்படுகின்றனா்.
இந்த நிலையில், அதிமுக ஆட்சியில் கொண்டுவரப்பட்ட திட்டங்களை முடக்கியும், நீா்த்துப்போகவும் செய்து வரும் திமுக அரசையும் சென்னை மாநகராட்சி நிா்வாகத்தையும் கண்டித்தும், கொடுங்கையூா் எரிஉலை திட்டத்தை உடனடியாக திரும்பப் பெற வலியுறுத்தியும், அதிமுக வட சென்னை வடக்கு (கிழக்கு) மாவட்டம் சாா்பில், ஜூன் 2-இல் சென்னை மாநகராட்சி, மண்டலம் 4-க்கு எதிரில் அமைந்துள்ள தபால் நிலையம் அருகில் காலை 10 மணிக்கு கண்டன ஆா்ப்பாட்டம் நடைபெறும் என்று அவா் தெரிவித்துள்ளாா்.
