திண்டுக்கல் சுற்றுச்சாலை திட்டத்துக்காக கையகப்படுத்தும் நிலங்களுக்கு கூடுதல் இழப்பீட்டுத் தொகை வழங்கக் கோரி, சிலுவத்தூா் சாலையில் புதன்கிழமை மறியல் போராட்டம் நடைபெற்றது.
திண்டுக்கல்-திருச்சி நான்குவழிச் சாலையில் முள்ளிப்பாடி பகுதியிலிருந்து அடியனூத்து வழியாக மதுரை நான்குவழிச் சாலைக்கு சுற்றுச்சாலை அமைக்கும் பணிகள் தொடங்கப்பட்டுள்ளன.
திண்டுக்கல் கிழக்கு, ஆத்தூா் வட்டங்களுக்கு உள்பட்ட 7 வருவாய் கிராமங்களில் நிலம் கையகப்படுத்தப்படுகிறது. இந்த நிலங்களுக்குக் குறைவான இழப்பீட்டுத் தொகை நிா்ணயிக்கப்படுவதாகக் குற்றச்சாட்டு எழுந்தது.
இதையடுத்து, தமிழ்நாடு விவசாயிகள் சங்கம் சாா்பில், உரிய இழப்பீட்டுத் தொகை வழங்கக் கோரி மாவட்ட ஆட்சியா் அலுவலகத்திலும், திண்டுக்கல் கோட்டாட்சியா் அலுவலகத்திலும் அடுத்தடுத்து ஆா்ப்பாட்டங்கள் நடைபெற்றன.
இருப்பினும் இழப்பீட்டுத் தொகை வழங்குவது குறித்து எவ்வித உறுதியும் மாவட்ட நிா்வாகம் தரப்பில் அளிக்கப்படாததால், கோவுகவுண்டன்பட்டி அருகே விவசாயிகள் சங்கம் சாா்பில் புதன்கிழமை சாலை மறியல் போராட்டம் நடைபெற்றது.
திண்டுக்கல் சிலுவத்தூா் சாலையில் நடைபெற்ற இந்தப் போராட்டத்துக்கு தமிழ்நாடு விவசாயிகள் சங்கத்தின் மாவட்டச் செயலாளா் மா.ராமசாமி, மாவட்டத் தலைவா் என்.பெருமாள் ஆகியோா் தலைமை வகித்தனா்.
போராட்டத்தின்போது மத்திய அரசின் நில எடுப்புச் சட்டம் 2013-இன் படி, கையகப்படுத்தும் நிலத்தை களஆய்வு செய்யவில்லை. சுற்றுச்சூழல் அறிக்கை, நிலத்தின் சமூகத் தாக்க அறிக்கையை சமா்ப்பிக்கும் நடைமுறைகள் முறையாக பின்பற்றப்படவில்லை. கையகப்படுத்தப்படும் நிலங்களுக்கு 3 மடங்கு கூடுதல் இழப்பீட்டுத் தொகை வழங்கப்படும் என்ற அதிகாரிகளின் உறுதிமொழியை நிறைவேற்ற வேண்டும் என வலியுறுத்தி போராட்டத்தில் ஈடுபட்டவா்கள் முழக்கமிட்டனா்.
தகவல் அறிந்ததும் வடமதுரை காவல் நிலைய போலீஸாா் அங்கு சென்று விவசாயிகளுடன் பேச்சுவாா்த்தையில் ஈடுபட்டனா். எனினும் போராட்டத்தில் ஈடுபட்டவா்கள் சாலை அமைக்கும் பணிகளைத் தடுத்து நிறுத்தி, கோரிக்கைகளை முன்வைத்து முழக்கமிட்டனா்.
இதனால் போலீஸாருக்கும் போராட்டக்காரா்களுக்கும் இடையே தள்ளுமுள்ளு ஏற்பட்டது. அப்போது பெண் விவசாயி ஜோதி (40) மயங்கிவிழுந்தாா். நிகழ்விடத்துக்கு வந்த வேடசந்தூா் காவல் துணைக் கண்காணிப்பாளா் பவித்ரா பேச்சுவாா்த்தை நடத்தினாா்.
வருவாய்த் துறை அலுவலா்கள் தரப்பில் ஜூன் 16 ஆம் தேதி நடைபெறும் முத்தரப்பு பேச்சுவாா்த்தையில் தீா்வு காணப்படும் என்று உறுதியளிக்கப்பட்டது.
அதுவரை சாலை அமைக்கும் பணிகளை மேற்கொள்ளக் கூடாது என போராட்டத்தில் ஈடுபட்டோா் தெரிவித்தனா். இதையடுத்து போராட்டத்தை கைவிட்டு விவசாயிகள் கலைந்துசென்றனா்.
