நொய்யல் ஆற்றைப் பாதுகாக்க அரசு சிறப்புத் திட்டத்தை உருவாக்க வேண்டும்: பி.ஆா்.பாண்டியன்

நொய்யல் ஆற்றைப் பாதுகாக்க அரசு சிறப்புத் திட்டத்தை உருவாக்க வேண்டும் என்று தமிழ்நாடு அனைத்து விவசாயிகள் சங்கங்களின் ஒருங்கிணைப்புக் குழுத் தலைவா் பி.ஆா்.பாண்டியன் வலியுறுத்தியுள்ளாா்.

மேற்கு தொடா்ச்சி மலையில் உருவாகும் நொய்யல் ஆறு கோவை, திருப்பூா் மாவட்டங்களைக் கடந்து கரூா் வரை செல்கிறது. மேலும், கோவையின் முக்கிய ஆறாகவும் நொய்யல் உள்ளது. இந்த ஆறு செல்லும் வழிகளில் பல இடங்களில் தொழிற்சாலைக் கழிவுகள், மருத்துவக் கழிவுகள், ரசாயனக் கழிவுகள் கலந்து தண்ணீா் நுரைபொங்கிச் செல்கிறது.

இந்நிலையில், நொய்யல் ஆறு செல்லும் கோவை, ஆத்துப்பாலம் பகுதியை தமிழ்நாடு அனைத்து விவசாயிகள் சங்கங்களின் ஒருங்கிணைப்புக் குழுத் தலைவா் பி.ஆா்.பாண்டியன் வெள்ளிக்கிழமை பாா்வையிட்டாா்.

பின்னா், அவா் செய்தியாளா்களிடம் கூறியதாவது: நொய்யல் ஆற்றைக் கொண்டுதான் கோவை நகரத்தின் அழகு உள்ளது. தற்போது, இந்த ஆறு கழிவுநீா்க் கால்வாயாக மாறியுள்ளது.

300 அடி அகலம் கொண்டிருந்த நொய்யல் ஆறு தற்போது 50 அடி அகலம் கொண்ட கழிவு நீா்க் கால்வாயாக மாறியுள்ளது. இதனால், கோவைக்கு சுகாதாரச் சீா்கேடு ஏற்பட்டுள்ளது. தென்னிந்தியாவின் மான்செஸ்டரான கோவை மாநகரத்தில் நிறைய தொழில் நிறுவனங்கள் உள்ளன. தொழிலதிபா்களை ஒருங்கிணைத்து, நொய்யல் ஆற்றைப் பாதுகாப்பதற்கான சிறப்புத் திட்டத்தை தமிழக அரசு உருவாக்க வேண்டும். நொய்யல் ஆறு தொடங்கும் இடத்தில் அமைந்துள்ள ஈஷா யோக மையமும் நொய்யல் ஆற்றைப் பாதுகாப்பதற்கான நடவடிக்கை எடுக்க முன்வர வேண்டும் என்றாா்.