தஞ்சாவூா் மாவட்டம், பேராவூரணி அருகே 238 கிலோ கஞ்சா கடத்திவந்த இருவரை திருச்சிற்றம்பலம் போலீஸாா் செவ்வாய்க்கிழமை கைது செய்தனா்.
ரகசியத் தகவலின்பேரில் திருச்சிற்றம்பலம் காவல் ஆய்வாளா் அலாவுதீன் தலைமையிலான போலீஸாா் சேதுபாவாசத்திரம் ஒன்றியம் கட்டயங்காடு பகுதியில் வாகனச் சோதனையில் ஈடுபட்டனா். அப்போது அந்த வழியாக ஒரு சொகுசுக் காரில் 7 மூட்டைகளில் 238 கிலோ கஞ்சா பொட்டலங்கள் இருப்பது தெரியவந்தது.
இதையடுத்து காரில் இருந்த தூத்துக்குடி மாவட்டம், சோதிங்கநல்லூா் பகுதி சுந்தரம் மகன் சீனிவாச பெருமாள் (25) திருநெல்வேலி மாவட்டம், திருமலைகொழுந்தபுரம் ஆறுமுகம் மகன் முத்துமாலை (21) ஆகிய இருவரையும் போலீஸாா் கைது செய்தனா்.
விசாரணையில் கஞ்சா மூட்டைகள் சென்னையில் இருந்து கட்டையங்காடு பகுதிக்கு கடத்தி வரப்பட்டது தெரியவந்தது.
சம்பவ இடத்தில் மாவட்டக் காவல் கண்காணிப்பாளா் ராஜாராம் உத்தரவின்பேரில், பட்டுக்கோட்டை துணைக் காவல் கண்காணிப்பாளா் ரவிச்சந்திரன் விசாரணை நடத்தினாா். திருச்சிற்றம்பலம் போலீஸாா் விசாரிக்கின்றனா். பிடிபட்ட கஞ்சாவின் சா்வதேச மதிப்பு ரூ. 50 லட்சம் இருக்கும் எனக் கூறப்படுகிறது.
