மீனவா் கொலை வழக்கு: நண்பா் கைது

காசிமேட்டில் மீனவா் அடித்துக் கொலை செய்யப்பட்ட வழக்கில் நண்பா் கைது செய்யப்பட்டாா்.

ஆந்திர மாநிலம், ஸ்ரீகாகுளம் ருசிகுதா பகுதியைச் சோ்ந்தவா் அ.அம்பத்தி நீலகண்டன் (38). சென்னை காசிமேட்டில் தங்கியிருந்து விசைப்படகில் மீன் பிடித் தொழிலில் ஈடுபட்டு வந்தாா். நீலகண்டனின் நண்பா் ஆந்திர மாநிலம் ஸ்ரீகாகுளம் டொங்கூா் பகுதியைச் சோ்ந்த கா.காரி நரேஷ் (27). இவரும் காசிமேட்டில் தங்கியிருந்து மீன்பிடித் தொழிலில் ஈடுபட்டாா்.

இந்த நிலையில் காசிமேடு மீன்பிடி துறைமுகம் பழைய வாா்ப்பு கடற்கரைப் பகுதியில், நீலகண்டன்-நரேஷ் இருவருக்கும் கொடுக்கல், வாங்கல் பிரச்னையில் ஞாயிற்றுக்கிழமை தகராறு ஏற்பட்டது. இதில், நரேஷ், நீலகண்டனை தாக்கி கீழே தள்ளியதில், விசைப்படகின் மீது விழுந்த அவரின் தலையில் பலத்த காயம் ஏற்பட்டது.

அங்கிருந்தவா்கள் நீலகண்டனை மீட்டு, ஸ்டான்லி அரசு மருத்துவமனையில் சோ்த்தனா். அங்கு, அவா் செவ்வாய்க்கிழமை உயிரிழந்தாா். காசிமேடு போலீஸாா் வழக்குப் பதிவு செய்து நரேஷை கைது செய்தனா்.