சேலம் மாவட்டம் மேட்டூா் அருகே தமிழக- கா்நாடக எல்லையில் உத்தரப் பிரதேச மாநில சுற்றுலா வாகனத்தை போலீஸாா் சோதனையிட்டபோது ஏற்பட்ட தகராறில் மூன்று தலைமைக் காவலா்கள் பணியிடை நீக்கம் செய்யப்பட்டனா்.
தமிழக -கா்நாடக எல்லைப் பகுதியில் மதுக்கடத்துலைத் தடுக்கவும், கள்ளச்சாராயத்தைக் கட்டுப்படுத்தவும் மேட்டூா் மதுவிலக்கு அமலாக்கப் பிரிவு போலீஸாரின் சோதனைச் சாவடி, காரைக்காட்டில் அமைக்கப்பட்டுள்ளது. இங்கு சுழற்சி முறையில் காவலா்கள் கண்காணிப்புப் பணியில் ஈடுபட்டு வருகின்றனா். கடந்த வெள்ளிக்கிழமை காலை உத்தரப் பிரதேசத்திலிருந்து ஆன்மிக சுற்றுலாப் பயணிகளின் சொகுசுப் பேருந்து கா்நாடக மாநிலம், மாதேஸ்வரன் மலை நோக்கிச் சென்றது.
அந்த பேருந்தை நிறுத்தி, காரைக்காடு சோதனைச் சாவடியில் பாதுகாப்புப் பணியில் இருந்த தலைமைக் காவலா்கள் சுகவனேஸ்வரன், செந்தில்குமாா், முத்தரசன் ஆகியோா் சோதனையிட முயன்ாகக் கூறப்படுகிறது. அப்போது சொகுசுப் பேருந்து ஓட்டுநா், நடத்துநா் ஆகியோருடன் வாக்குவாதம் ஏற்பட்டது.
இதில் பேருந்து ஓட்டுநா் சிவநாராயணன் (52), நடத்துநா் ஆஜய் (20) ஆகியோா் போலீஸாரை இரும்புக் குழாயினால் தாக்கினா். அதிா்ச்சியடைந்த போலீஸாா், பேருந்து ஓட்டுநா், நடத்துநரை தடியாலும், பிளாஸ்டிக் குழாயினாலும் தாக்கினா். தமிழக போலீஸாரை உத்தரப் பிரதேச சுற்றுலாப் பேருந்தில் வந்தவா்கள் தாக்கியதால், அங்கு இருந்த கிராம மக்களும் சுற்றுலாப் பயணிகளைத் தாக்கினா்.
இந்தச் சம்பவம் தொடா்பாக மேட்டூா் மதுவிலக்கு அமலாக்கப் பிரிவு தலைமைக் காவலா் செந்தில்குமாா் கொளத்தூா் காவல் நிலையத்தில் அளித்த புகாரின் பேரில் சுற்றுலாப் பயணிகள் பேருந்து ஓட்டுநா் சிவநாராயணன், நடத்துநா் அஜய் ஆகியோா் மீது போலீஸாா் வழக்குப் பதிவு செய்தனா்.
அதேபோல சொகுசுப் பேருந்து ஓட்டுநா் சிவநாராயணன் அளித்த புகாரின் பேரில் காரைக்காடு, சோதனைச்சாவடியில் பணியில் இருந்த மதுவிலக்கு அமலாக்கப் பிரிவு தலைமைக் காவலா்கள் சுகவனேஸ்வரன், செந்தில்குமாா், முத்தரசன் மற்றும் பொதுமக்கள் மீது கொளத்தூா் போலீஸாா் வழக்குப் பதிவு செய்துள்ளனா்.
போலீஸாா் மீது கொளத்தூா் காவல் நிலையத்தில் குற்ற வழக்குப் பதிவு செய்திருப்பதாக மேட்டூா் காவல் துணை கண்காணிப்பாளா் ஆரோக்கியராஜ் சனிக்கிழமை மாவட்ட காவல் கண்காணிப்பாளருக்கு அறிக்கை சமா்ப்பித்தாா். அந்த அறிக்கையின் பேரில் தலைமைக் காவலா்கள் மூவரையும் பணியிடை நீக்கம் செய்து மாவட்ட காவல் கண்காணிப்பாளா் நடவடிக்கை மேற்கொண்டுள்ளாா்.
