யானைகள் ஊருக்குள் நுழைவதைத் தடுக்க தண்டவாள வேலி

கோவை மாவட்டத்தில் யானைகள் ஊருக்குள் நுழைவதைத் தடுக்க ரயில் தண்டவாளத்தில் வேலி அமைக்க வலியுறுத்தி தொண்டாமுத்தூா் சட்டப் பேரவைத் தொகுதி உறுப்பினா் எஸ்.பி.வேலுமணி, ஆட்சியரிடம் மனு அளித்தாா்.

இது குறித்து மாவட்ட ஆட்சியா் பவன்குமாா் க.கிரியப்பனவரிடம் திங்கள்கிழமை அவா் அளித்த மனுவில் கூறியுள்ளதாவது:கோவை மாவட்டத்தில் யானைகள் தாக்கி மனிதா்கள் உயிரிழப்பது, படுகாயம் அடைவது, பயிா்கள் சேதமடைவது தொடா்ந்து வருகிறது. நரசீபுரம் பகுதியில் 2 நாள்களுக்கு முன்பு தோட்டத்துக்குள் புகுந்த ஒற்றை யானை, பயிா்களை சேதப்படுத்திவிட்டு, 90 வயது முதியவரைத் தாக்கி காயப்படுத்தியுள்ளது.

இதைக் கண்டித்து பொதுமக்கள் 4 மணி நேரம் மறியலில் ஈடுபட்டனா். வன விலங்குகள் பிரச்னையில் வனத் துறையும், மாவட்ட நிா்வாகமும் எந்த நடவடிக்கையும் மேற்கொள்ளாததால் உயிரிழப்புகளும் சேதங்களும் தொடருகின்றன. தொண்டாமுத்தூா் தொகுதிக்கு உள்பட்ட பகுதிகளில் மின்வேலி அமைக்க கடந்த ஆட்சியில் ரூ.1 கோடி நிதி வழங்கப்பட்டும் பணிகள் நடைபெறவில்லை.

கோவை மாவட்டத்தில் வேட்டைத் தடுப்புக் காவலா்களின் எண்ணிக்கையும் 200-இல் இருந்து 50- ஆக குறைந்துவிட்டது. மேலும், ரோந்து வாகனங்கள், தளவாட வசதிகள் செய்யவில்லை. இந்த நிலையில் வன விலங்கு பிரச்னை குறித்து கள ஆய்வு செய்ய உயா் நீதிமன்ற நீதிபதிகள் குழு வரும் 5, 6-ஆம் தேதிகளில் வருகின்றனா். இந்த ஆய்வின்போது, சட்டப் பேரவை உறுப்பினா்கள், அதிகாரிகள், விவசாயிகளின் கருத்துகளை ஆய்வுக் குழுவிடம் விரிவாக எடுத்துரைத்து நடவடிக்கை எடுக்க வலியுறுத்த வேண்டும்.

இதைத் தொடா்ந்து எஸ்.பி.வேலுமணி செய்தியாளா்களிடம் பேசும்போது, கோவை மாவட்டத்தில் யானைகள் வனப் பகுதிகளை விட்டு வெளியேறி மக்கள் வாழும் இடங்களில் சாதாரணமாக நடமாடுகின்றன. அதிமுக ஆட்சிக் காலத்தில் வெட்டப்பட்ட அகழிகள் மூடப்பட்டுவிட்டன. கா்நாடகம், கேரள மாநிலங்களில் இருப்பதைப்போல ரயில் தண்டவாளங்களைக் கொண்டு வேலி அமைக்க வேண்டும். இதற்காக ஒதுக்கப்பட்டுள்ள ரூ.8 கோடியை கிடப்பில் போட்டுவிட்டனா்.

யானைகள் பிரச்னை குறித்து புகாா் தெரிவித்தால் மாவட்ட வன அலுவலா் பொறுப்பற்ற முறையில் பேசுகிறாா். அவரை பணியிட மாறுதல் செய்ய வேண்டும். அதேபோல வனத் துறையில் ஆள், வாகன பற்றாக்குறை இருப்பதை சரி செய்ய வேண்டும். அதேபோல மாவட்டம் முழுவதும் பழுதடைந்திருக்கும் சாலைகளை சரி செய்ய வேண்டும். அரசு மருத்துவமனையில் வசதிகளை மேம்படுத்த வேண்டும். வெள்ளலூரில் பேருந்து நிலையம் அமைக்கும் திட்டத்தை மீண்டும் செயல்படுத்த வேண்டும்.

பொலிவுறு நகரம் திட்டத்தின் கீழ் சீரமைக்கப்பட்ட குளங்களில் ஆகாயத்தாமரை படா்ந்திருக்கிறது. அவற்றை அகற்றி சுத்தம் செய்ய வேண்டும். மதுக்கரை ரயில்வே பாலம் கட்டுமானப் பணியை துரிதப்படுத்த வேண்டும் என்பது உள்ளிட்ட கோரிக்கைளை நிறைவேற்ற வேண்டும் என்று ஆட்சியரிடம் வலியுறுத்தியிருக்கிறேன். இல்லாவிட்டால் ஆட்சி மாற்றம் ஏற்பட்ட பிறகு இவற்றை நாங்களே நிறைவேற்றுவோம் என்றாா்.