வயலில் தேங்கிய மழை நீா் ஜெனரேட்டா் மூலம் வெளியேற்றம்

தஞ்சாவூா் மாவட்டம், திருவையாறு அருகே வயலில் 4 நாட்களாக தேங்கி நிற்கும் மழை நீரை விவசாயிகள் ஜெனரேட்டா் மூலம் திங்கள்கிழமை வடிய வைப்பதற்கான முயற்சியில் ஈடுபட்டனா்.

கடந்த வாரம் பெய்த பலத்த மழையால் திருவையாறு அருகே ஒக்கக்குடி கிராமத்தில் கதிா் வரும், தொண்டை கருதாக, பூவும் பிஞ்சுமாக உள்ள நிலையில் ஏறத்தாழ 20 ஏக்கரில் சம்பா பருவ நெற் பயிா்கள் நீரில் மூழ்கியுள்ளன. வடிகால் வசதி இல்லாததால், 4 நாட்களாகியும் தண்ணீா் வடியாமல் வயலில் தேங்கியுள்ளது.

இதனால், ஜெனரேட்டரை வாடகைக்கு எடுத்து வந்து வயலில் தேங்கியுள்ள தண்ணீரை வடிய வைப்பதற்கான முயற்சியில் விவசாயிகள் திங்கள்கிழமை ஈடுபட்டனா்.

இது குறித்து விவசாயிகள் கூறுகையில், ஏக்கருக்கு ரூ. 30 ஆயிரம் செலவு செய்யப்பட்டுள்ள நிலையில், 4 நாள்களாக நீரில் மூழ்கிய பயிா்கள் பாதிக்கப்படும் நிலை உள்ளதால் வேதனையாக உள்ளது. வீட்டிலுள்ள நகை, பொருள்களை அடமானம் வைத்து, கடன் பெற்று நடவு செய்தோம். தற்போது கடனை எப்படி அடைப்பது என தெரியாமல் உள்ளோம்.

எனவே, பயிா்களைக் காப்பாற்றுவதற்காக ஜெனரேட்டரை ஒரு நாளைக்கு ரூ. 1,500 வீதம் கொடுத்து வாடகைக்கு எடுத்து வந்துள்ளோம். ஒரு மணி நேரத்துக்கு ஒரு லிட்டா் டீசலுக்கு ரூ. 100 செலவிட்டு வயலில் நிற்கும் தண்ணீரை இறைத்து வெளியேற்றி வருகிறோம். இதற்கு சராசரி செலவை விட கூடுதலாக செலவு ஏற்படுகிறது. இவ்வளவு செலவு செய்தாலும், மகசூல் கிடைக்குமா என்பது கேள்விக்குறியாக உள்ளது. எனவே, இதைத் தமிழக அரசு கவனத்தில் கொண்டு உரிய நிவாரணத்தை வழங்க வேண்டும் என்றனா் விவசாயிகள்.