வீரவணக்க நாள் கூட்டம் நடத்த திமுகவுக்கு மட்டுமே தகுதி! -அமைச்சா் எ.வ.வேலு பேச்சு

மொழிப் போா் தியாகிகளுக்கு வீர வணக்க நாள் பொதுக்கூட்டங்கள் நடத்த திமுகவை தவிர, வேறெந்த திராவிட கட்சிகளுக்கும் தகுதி இல்லை என பொதுப்பணித் துறை அமைச்சா் எ.வ.வேலு கூறினாா்.

சேலம் மத்திய மாவட்ட திமுக சாா்பில் மொழிப்போா் தியாகிகள் வீர வணக்க நாள் பொது கூட்டம் சேலம், கோட்டை மைதானத்தில் சனிக்கிழமை இரவு நடைபெற்றது.

சேலம் மத்திய மாவட்ட திமுக செயலாளரும், சுற்றுலாத் துறை அமைச்சருமான ராஜேந்திரன் தலைமையில் நடைபெற்ற இந்தக் கூட்டத்தில், பொதுப்பணி மற்றும் நெடுஞ்சாலைத் துறை அமைச்சருமான எ.வ.வேலு கலந்துகொண்டு பேசியதாவது:

மொழிப்போா் தியாகிகளுக்கு வீர வணக்க நாள் பொது கூட்டம் நடத்த தகுதி பெற்ற ஒரே அரசியல் இயக்கம் திமுகதான். மக்களை ஏமாற்ற அதிமுக மொழிப்போா் தியாகிகள் வீரவணக்க நாள் பொதுக்கூட்டங்களை நடத்தி வருகிறது. 20 ஆம் நூற்றாண்டுக்கு முன்பு தமிழ் வளா்த்த பெருமை பக்தி இலக்கியத்துக்குதான் உண்டு.

பகுத்தறிவாளன் என்ற முறையில் இதை நான் சொல்வதே பொருத்தமாக இருக்கும். தமிழகத்துக்கு வரும்போது மட்டும் திருக்குறளையும், திருவள்ளுவரையும் புகழ்ந்து பேசும் பிரதமா் மோடி தமிழை ஆட்சி மொழியாக அறிவிக்க மறுப்பது ஏன்? ஒவ்வொரு மாநிலத்திலும் ஒவ்வொரு மொழி இருக்கும்போது, இந்திக்கு முக்கியத்துவம் கொடுப்பது எந்த விதத்தில் நியாயம் என்றாா்.

முன்னதாக, மேடையில் அலங்கரித்து வைக்கப்பட்டிருந்த மொழிப் போா் தியாகிகளின் திருவுருவப் படத்துக்கு அமைச்சா்கள் மலா் தூவி மரியாதை செலுத்தினா்.

கூட்டத்தில், மேற்கு மாவட்ட திமுக செயலாளரும், மக்களவை உறுப்பினருமான டி.எம்.செல்வகணபதி, மத்திய மாவட்ட அவைத் தலைவா் சுபாஷ், பொருளாளா் காா்த்திகேயன், மேயா் ராமச்சந்திரன், தொகுதி பாா்வையாளா்கள் சுகவனம், பாா் இளங்கோ, விவேக், ராஜசேகா், மாணவரனி மாவட்ட அமைப்பாளா் கோகுல் காளிதாஸ், மாநகர அமைப்பாளா் மணிகண்டன் உள்ளிட்ட ஏராளமானோா் கலந்துகொண்டனா்.