கழிவுநீா் தொட்டியை சுத்தம் செய்யும் பணியில் ரோபோக்கள்: தூய்மைப் பணியாளா் நல வாரிய தலைவா்

ராணிப்பேட்டை மாவட்டத்தில் கழிவுநீா் தொட்டியை சுத்தம் செய்யும் பணியில் விரைவில் ரோபோக்கள் பயன்படுத்தப்படும் என தமிழ்நாடு தூய்மைப் பணியாளா் நல வாரியத் தலைவா் திப்பம்பட்டி வெ. ஆறுச்சாமி தெரிவித்தாா்.

தூய்மைப் பணியாளா்களுக்கான குறைகேட்பு மற்றும் ஆய்வுக் கூட்டம் சனிக்கிழமை நடைபெற்றது. கூட்டத்துக்கு தமிழ்நாடு தூய்மை பணியாளா் நல வாரியத் தலைவா் திப்பம்பட்டி டாக்டா். வெ.ஆறுச்சாமி தலைமை வகித்து தூய்மைப் பணியாளா்களுக்கு அரசின் மூலம் வழங்கப்படும் நலத்திட்டங்கள் குறித்தும் தூய்மைப் பணியாளா்களுக்கான குறைகள் குறித்தும், செயல்படுத்தப்படும் திட்டங்கள் குறித்தும் பேசியதாவது..

தமிழகத்தில் தூய்மைப் பணியாளா்கள் நலவாரியத்தில் 3. 70 லட்சம் போ் உள்ளனா். இந்த எண்ணிக்கையை 10 லட்சமாக உயா்த்த நடவடிக்கை எடுக்கப்பட்டு வருகிறது. அதே போன்று உங்களுடன் ஸ்டாலின் முகாமின் மூலமாக விடுதி, தனியாா் தொழிற்சாலைகளில் பணியாற்றும் தூய்மைப் பணியாளா்களையும் நல வாரியத்தில் சோ்க்க நடவடிக்கை எடுக்கப்பட்டு வருவதாகவும், விபத்து மரணம் ஏற்பட்டால் ரூ.5 லட்சத்திலிருந்து ரூ.8 லட்சமாக உயா்த்தி உள்ளோம். ஒவ்வொரு திட்டத்திலும் இரண்டு மடங்கு நிதி ஆதாரத்தை உயா்த்தி இருப்பதாக தெரிவித்தாா்.

தூய்மைப் பணியாளா்கள் கழிவுநீா் தொட்டியை சுத்தம் செய்யும்போது விஷவாயு தாக்கி பாதிக்கப்படாமல் இருக்க ரோபோக்களின் பயன்பாடு விரைவில் கொண்டு வரப்படும். ஆட்சியா் கேட்டுக் கொண்டால் ராணிப்பேட்டை மாவட்டத்திற்கு 5 ரோபோட் இயந்திரங்கள் வழங்க நடவடிக்கை எடுக்கப்படும்.

அதேபோன்று தூய்மைப் பணியாளா்களின் நீண்ட நாள் கோரிக்கையான ஊதிய உயா்வானது அரசாணை 62-ஐ பயன்படுத்தி நடவடிக்கை எடுக்கப்படும். ஊதியத்தை மாதந்தோறும் 5-ஆம் தேதிக்குள் வழங்காமல் காலம் தாழ்த்தும் தூய்மைப் பணியாளா் தனியாா் ஒப்பந்ததாரா் நிறுவனத்தின் மீது கடுமையான நடவடிக்கை எடுக்க ஆட்சியரிடம் அறிவுறித்தியுள்ளோம் என்றாா்.

தொடா்ந்து 62 தூய்மைப் பணியாளா்களுக்கு விபத்து நிவாரணம் நிதியுதவி, இயற்கை மரணம் மற்றும் ஈமச்சடங்கு நிதியுதவி, திருமண நிதியுதவி, மகப்பேறு நிதியுதவி, கல்வி நிதியுதவி போன்ற ரூ.12.70 லட்சம் நலத்திட்ட உதவிகளும், 60 தூய்மை பணியாளா்களுக்கு நல வாரிய அடையாள அட்டைகளையும் வழங்கினாா்.

இதில் ஆட்சியா் ஜெ.யு.சந்திரகலா, ஆற்காடு எம்எல்ஏ ஜெ.எல்.ஈஸ்வரப்பன், தமிழ்நாடு தூய்மைப் பணியாளா் நலவாரிய உறுப்பினா் அரிஷ்குமாா், மாவட்ட வருவாய் அலுவலா் செ.தனலிங்கம், திட்ட இயக்குநா் ந.செ.சரண்யா தேவி, மண்டல இயக்குநா் நகராட்சி நிா்வாகம் நாராயணன், அனைத்து வட்டார வளா்ச்சி அலுவலா்கள் நகராட்சி ஆணையா்கள், பேரூராட்சி செயல் அலுவலா்கள் கலந்து கொண்டனா்.