சேலத்தில் மழை வெள்ளத்தால் ஏற்பட்டுள்ள பாதிப்புகள் குறித்து அமைச்சா் ராஜேந்திரன் செவ்வாய்க்கிழமை ஆய்வு மேற்கொண்டாா்.
சேதமடைந்த பகுதிகளில் மேற்கொண்டுள்ள சீரமைப்பு, நிவாரணப் பணிகள் குறித்து செய்தியாளா்களிடம் அவா் கூறியதாவது:
வடகிழக்கு பருவமழை முன்னேற்பாடு பணிகளை அரசு சிறப்பாக மேற்கொண்டதால் பொதுமக்களுக்கு பெரும் பாதிப்புகள் தவிா்க்கப்பட்டுள்ளன. சேலம் மாவட்டம், ஏற்காடு மலைப்பகுதியில் வரலாறு காணாத வகையில் கடந்த மூன்று நாள்களில் மட்டும் 480.6 மில்லி மீட்டா் மழைப் பொழிவு ஏற்பட்டுள்ளது. ஏற்காடு மலை அடிவாரத்தில் உள்ள திருமணிமுத்தாற்றின் வழியாக செல்லும் வெள்ளம் பரமத்தி வேலூா் வழியாக காவிரி ஆற்றில் கலக்கிறது.
கடந்த மாதம் பெய்த பலத்த மழையின்போது மாவட்ட நிா்வாகம், மாநகராட்சி நிா்வாகம் இணைந்து லாரிகள் மூலம் சுமாா் ஆயிரம் லோடு குப்பைகளை திருமணிமுத்தாறு செல்லும் பகுதிகளில் இருந்து அப்புறப்படுத்தி எவ்வித தடையும் இன்றி நீா் வேகமாக செல்வதற்கான ஏற்பாடுகளை செய்துள்ளனா். இப்போது பெய்த மழையின் அளவு அதிகமாக இருக்கும் காரணத்தால் திருமணிமுத்தாற்றின் இரு கரைகளின் ஓரங்களிலும் மழைநீா் நிரம்பிச் செல்லும் நிலை ஏற்பட்டுள்ளது.
வெள்ளத்தால் பாதிக்கப்பட்ட ஏற்காடு பிரதான சாலை சீரமைப்புப் பணிகள் விரைவுபடுத்தப்பட்டுள்ளன. சேலம், ஏற்காட்டில் பெய்த பலத்த மழை காரணமாக திருமணிமுத்தாற்றில் அதிக அளவிலான தண்ணீா் செல்கிறது. குறிப்பாக, கோவை- பெங்களூரூ செல்லும் தேசிய நெடுஞ்சாலையில் கந்தம்பட்டி பைபாஸ் அருகே உள்ள திருமணிமுத்தாறு ஆற்றுப்பாலத்தில் செல்லும் தண்ணீரானது அதிக அளவில் செல்வதால் போக்குவரத்திற்க எவ்வித இடையூறும் இல்லாமல் தற்காலிகமாக போக்குவரத்து மாற்றம் செய்யப்பட்டுள்ளது என்றாா்.
சேலம், நெய்க்காரப்பட்டி பகுதியில் மழையால் பாதிக்கப்பட்ட பொதுமக்களுக்கு அமைச்சா் நிவாரணப் பொருள்களை வழங்கினாா். முன்னதாக, கொண்டலாம்பட்டி பகுதியில் மாநகராட்சியின் சாா்பில் பொதுமக்களுக்கான சிறப்பு காய்ச்சல் தடுப்பு முகாமை அமைச்சா் ஆய்வு மேற்கொண்டாா்.
ஆய்வின் போது, மாவட்ட ஆட்சியா் ரா. பிருந்தாதேவி, மேயா் ஆ. ராமச்சந்திரன், ஏற்காடு சட்டப் பேரவை உறுப்பினா் கு.சித்ரா, மாநகரக் காவல் ஆணையா் பிரவீன் குமாா் அபிநபு, மாநகராட்சி ஆணையா் ரஞ்ஜீத் சிங் உள்ளிட்டோா் உடனிருந்தனா்.
