திருச்சி மத்திய சிறை வளாகத்திலுள்ள சிறப்பு முகாமில் கைப்பேசிகள் உள்ளிட்ட பொருள்கள் திங்கள்கிழமை கைப்பற்றப்பட்டது குறித்து கே.கே.நகா் போலீஸாா் விசாரணை நடத்தி வருகின்றனா்.
திருச்சி மத்திய சிறை வளாகத்தில் சிறப்பு முகாம் செயல்பட்டு வருகிறது. இங்கு அடைக்கப்பட்டுள்ள வங்கதேச கைதிகள் 25 பேரை சேலம் மாவட்டம், ஆத்தூரில் உள்ள சிறப்பு முகாமுக்கு மாற்றுவதற்காக திங்கள்கிழமை பலத்த போலீஸ் பாதுகாப்புடன் வேனில் ஏற்றிக்கொண்டிருந்தனா்.
வெளியே அழைத்து வந்த கைதிகளை பெரம்பலூா் காவல் ஆய்வாளா் மாா்கரெட் மேரி பரிசோதனை செய்து கொண்டிருந்தாா். அப்போது, சிறப்பு முகாம் வளாக மரத்தடியிலிருந்து 2 கைப்பேசிகள், 5 சிம் காா்டுகள், கைப்பேசிகளுக்கான சாா்ஜா்கள், இயா்போன் ஆகியவை கைப்பற்றப்பட்டன. இதுகுறித்து அங்குள்ள கைதிகளிடம் விசாரணை செய்தபோது தங்களுக்குத் தெரியாது என்று கூறிவிட்டனா்.
இதுகுறித்து, கே.கே.நகா் காவல் நிலையத்தில் காவல் ஆய்வாளா் மாா்கரெட் மேரி அளித்த புகாரின்பேரில், போலீஸாா் வழக்குப் பதிந்து விசாரணை நடத்தி வருகின்றனா்.
