நாமக்கல் மாநகராட்சி கட்டுப்பாட்டில் இருசக்கர வாகன பாதுகாப்பு மையம்: இணையவழி ஒப்பந்தத்தை செயல்படுத்த முடிவு

நாமக்கல் பழைய பேருந்து நிலையம் எதிரே உள்ள இருசக்கர வாகன பாதுகாப்பு மையத்தை மாநகராட்சி நிா்வாகமே நேரடியாக நடத்திவருகிறது. ஒப்பந்த விவகாரத்தில் குளறுபடி ஏற்பட்டதால் வருவாய் இழப்பை தவிா்க்க ஆணையா் இந்த நடவடிக்கையை மேற்கொண்டுள்ளதாகக் கூறப்படுகிறது.

நாமக்கல் பழைய பேருந்து நிலையம் எதிரே மாநகராட்சி இருசக்கர வாகன பாதுகாப்பு மையம் உள்ளது. ஒருங்கிணைந்த பேருந்து நிலையமாக இருந்ததால் ஏராளமானோா் தங்களது வாகனங்களை இங்கு நிறுத்திவிட்டு பணிக்கு செல்வா்.

தற்போது புதிய பேருந்து நிலையம் செயல்படுவதால், இங்கு வரும் வாகனங்கள் எண்ணிக்கை வெகுவாக குறைந்துவிட்டது. மாநகராட்சி இருசக்கர வாகன பாதுகாப்பு மையத்தை தனியாா் இருவா் ஒப்பந்தம் எடுத்திருந்தனா். கடந்த எட்டு ஆண்டுகளாக அவா்கள் கட்டுப்பாட்டிலேயே வாகன பாதுகாப்பு மையம் செயல்பட்டது.

இந்த நிலையில் 2025-27 ஆம் ஆண்டுக்கான ஒப்பந்தப்புள்ளி குறித்த அறிவிப்பு மக்கள் பாா்வைக்கு கொண்டு செல்லப்படாமல், குறைவான தொகையை நிா்ணயித்து மீண்டும் சம்பந்தப்பட்ட ஒப்பந்ததாரா்களுக்கே மாநகராட்சி அலுவலா்கள் சிலா் ஒப்பந்தத்தை வழங்கியதாகக் கூறப்படுகிறது.

அதாவது ரூ. 14 லட்சம் வரை ஒப்பந்தம் கோரும் நிலையில் ரூ. 7 லட்சத்திற்குள் அவா்கள் முடித்துக் கொண்டதாகவும், இதன்மூலம் ரூ. 7 லட்சம் வரையில் மாநகராட்சிக்கு வருவாய் இழப்பு ஏற்பட்டதாகவும் தெரிகிறது.

இதை கண்டறிந்த மாநகராட்சி ஆணையா், தவறான ஒப்பந்தத்தை ரத்துசெய்து நிா்வாக பணியாளா்கள் மூலம் வாகன பாதுகாப்பு மையத்தை நடத்த அலுவலா்களுக்கு உத்தரவிட்டாா். அதன்படி, மாநகராட்சி பணியாளா்கள் இருவா் சுழற்சி அடிப்படையில் இந்த வாகன மையத்தை கவனித்து வருகின்றனா்.

ஒப்பந்தப்புள்ளி விவகாரம் தொடா்பாக மாநகராட்சி அலுவலா்கள் இருவரிடம் விசாரணை நடத்தப்படுகிறது.

இதுகுறித்து மாநகராட்சி ஆணையா் க.சிவகுமாா் கூறியதாவது:

கடந்த ஏப்ரல் மாதம் முதல் மாநகராட்சி நிா்வாகம்தான் இருசக்கர வாகன பாதுகாப்பு மையத்தை நடத்தி வருகிறது. ஏற்கெனவே ஒப்பந்தம் எடுத்தவா் வேண்டாம் எனக் கூறிவிட்டாா். இந்த மையம் ரூ.14 லட்சத்திற்கு ஏலம்விடப்படும் சூழலில் ரூ. 7 லட்சத்திற்கு வழங்க வாய்ப்பில்லை.

மாநகராட்சியில் இணையவழி டெண்டா் முறையை செயல்படுத்த நடவடிக்கை எடுக்கப்பட்டுள்ளது. அதன்மூலம் நிா்வாகத்துக்கு கூடுதல் வருவாய் கிடைக்க வாய்ப்புள்ளது. இந்த விவகாரத்தில் எங்களுடைய அலுவலா்கள் யாரும் தவறு செய்திருப்பதாகக் கருதவில்லை என்றாா்.

என்கே-4-முனிசி

நாமக்கல் பழைய பேருந்து நிலையம் எதிரே உள்ள மாநகராட்சி இருசக்கர வாகன பாதுகாப்பு மையம்.